Kolasib Dist. MNF-in Kawng dan an tum

Kolasib District MNF Block Joint Committee chuan, Kolasib district chhunga kawngpui hrang hrang chhia siam tura sorkar kar nan September 26, 2018 khian Kolasib district-ah NH-54 kawngpui dan an tum.

September 6, Ningania K Lalrinliana in, Kolasib-ah Kolasib district-a MNF block pangate joint meeting chuan resolution pass in, "Kawngpui chhiat lutuk vangin mipuite'n harsatna hrang hrang kan tâwk nasa hle a, kan mangang au aw lahin awmzia a nei thei si lo," an ti.

An resolution tarlan danin, Kolasib district-a inkal­pawhna kawngpui hrang hrangte siamṭhata a nih ngei theih nan Kolasib district-a MNF block panga - Tuirial East, Tuirial West, Kolasib, Serlui South leh Serlui North block huam chhungah September 26-ah zing dar 5 aṭanga tlai dar 5 inkarah NH-54 Kawngpui danchah (road block) an tum a; mipui hriat­thiamna leh thlàwpna an ngen a ni.

Kolasib district MNF-te, an district-a kawngpui chhe lutuk chu pawi an tih thu sawiin, "Heti taka kawngpui chhiat chhan hi Mizoram CM Pu Lal Thanhawla leh anau PWD minister Pu Lal Thanzara ten inhnam­hnawihna nei nia an sawi Sunshine Oversheas leh ABCI company-te hna chhiat lutuk vanga thleng a ni a, kawngpui enkawl zui zel tlakah kan ngai lo. Congress sorkarah hnam dang contractor-te heti tak maia an inluling hi ram leilung fate hmuhsitnaah kan ngai," an ti.