Polling party-te vote hralh leh lei a awm loh nan hma kan la dawn - Aizawl DC

Aizawl District Election Officer (DEO) chuan nimin khan Vanapa Hall-ah electronic voting machine (EVM) leh voter verifiable paper audit trail (VVPAT) chungchang inzirtirna hun, Sensitization Workshop an buatsaih a; chief electoral officer SB Shashank-a'n a hmanpui. Aizawl CEO Dr A Muthamma chuan, polling party-te'n vote an thlak dawnah vote hralh leh lei a awm loh nan hma an lak dawn thu a sawi.

SB Shashank chuan, kumina Mizoram Assembly inthlanpui neih tur chu inthlanna zalen, ralmuang, dik leh felfai a nih a beisei thu a sawi a, "Inthlanna dik leh felfai nei turin mi tinin mawh kan phûr a; political party, NGO, zirlaite leh mipui kan ṭan rual a ngai a ni," a ti a; khaw hrang hrangah EVM leh VVPAT hman dan inzirtirna leh vote thlak pawimawhzia inzirtirna kalpui mek a nih thu a sawi.

Workshop-ah hian joint CEO Zorammuana'n EVM leh VVPAT nihphung, a hnathawh leh vote thlak thlak dante a sawifiah a; kumin Assembly inthlana EVM hman turte chu a thar hlak, la hman loh a nih thu leh, EVM-te chu a changkan tial tial avangin Election Commission of India (ECI) aṭangin a awmna hriat vek theih a nih thu a sawi.

Inkhawmah hian zawhna leh chhanna hun hman a ni a, inkhawm zawhah EVM leh VVPAT hmanga vote thlak chhinna, mock poll neih a ni bawk.

Zawhna chhangin Aizawl CEO Dr A Muthamma chuan, postal ballot hmanga polling party-te'n vote an thlak dawnah vote hralh leh lei a awm loh nan hma an lak dawn thu a sawi a, "Postal ballot pek chhuah leh vote thlak inkarah hun âwl kan siam dawn lo a, loophole leh gap a awm lo ang," a ti.

Zawhna dang chhangin Dr A Muthamma chuan, Aizawl district bikah chuan Assembly inthlana vote tlate chu darkar 2-3 chhungin chhiar zawh vek theih dawn thu a sawi. Zorammuana chuan, constituency tin tan vote chhiarna counting hall siam a nih dawn thu a sawi bawk.

Election hotute chuan, Assama awm mek 3rd. IR battalion police-te'n vote an thlak theih nan hmalak a nih thu an sawi a, "Service voter anga vote an thlak theih nan hmalak mek a ni," an ti. Rualbanlote tan remchanna siamsak tum a nih thu an sawi a, "Aizawl district-ah hian persons with disability 1,850 kan hmu chhuak tawh a, mi 200 vel la enroll loh an awmin kan hria," an ti.