Lawngtlai khelmuala phûl lem phah hawng

Lawngtlaia Central Young Lai Association (CYLA) Playground-a phûl lem (artificial grass) phah thar chu nimin khan Sports & Youth Services minister Zodintluanga'n a hawng.

Minister chuan, Mizo naupangte'n talent an nei ṭha a, naupangte talent hai chhuah chu sport association-te mawh a nih thu a sawi.

Zodintluanga chuan, "Kan nau­pangte hi an naupan laia a nihna taka zirtir chuan talent an nei ṭha a, talent nei ṭha tam takte an talent hai chhuah chu district-a sports association te, district foot­ball association-te leh YLA-te mawhphurhna a ni," a ti a; sorkarin a bulṭhut (grassroot) aṭanga nau­pangte zirtir a ngaih pawimawh avangin chutianga hma la tur chuan sport association-te a chah.

Lawngtlaiah khelmuala arti­ficial turf phaha hman theih a ni ta chu Laite tan ni chhinchhiah tlak a nih thu sawiin Zodintluanga chuan, "Tun aṭanga kum rei lo teah chuan tuna field kotlanga naupang ṭhute hi India ram mai ni lo, khawvel infiamnaa an lang tur ka hmuh lâwk vang a ni," a ti a; naupangte chu zirna sikulah a thiam bik an nih vek dawn loh avangin infiamna lama an hlawhtlin theih nan leh an taksa hriselna atan pawh sport-a an tel a pawimawh thu a sawi.

Sports Minister chuan, CYLA Playground-a phûl lem phah chu enkawl dan dika enkawla a nih chuan kum 20 daih tur a nih thu a sawi a, CYLA leh Lawngtlai DFA-te chu uluk leh dimdawi taka enkawl turin a chah a; grass phah hawn tak enkawl hna chu CYLA kutah a hlan nghal a ni.

CYLA Playground-a phûl lem phah thar hawnnaah hian minister of state C Ngunlianchuanga, Lawngtlai East bialtu MLA H Zothangliana leh Lai Autonomous District Council (LADC) chief executive member T Zakunga te pawhin thu a sawi.

CYLA khelmuala phûl lem phahna atan hian kum 2017-18 khan Ministry of Youth Affairs & Sports - Khelo India Scheme aṭangin cheng nuai 450 hmuh a ni a; Lushai Engineers-in May 26, 2017-ah a siam hna thawk ṭanin, August 24, 2018-ah an zo a ni.

Phûl lem phah zau zawng chu a dung metre 110 leh a vâng metre 74 a ni a, football line bik chu metre 105 X 69 a ni. Synthetic turf chu Xtreme TurfD60 niin, Act Global USA siam, FIFA pawmpui a ni.