Mit pe tura intiam mi 6,513 an tling tawh

August 25 aṭanga September 8 chhung hi National Eye Donation Fortnight vawi 33-na hman a ni a; Fortnight chhung hian thih hnua mi tana mit pe (donate) tura intiam mi 1,145 an awm a, chu'ngte nen chuan Mizoramah thih hnua mit pe tura intiam mi 6,513 an awm tling tawh.

Eye Donation Fort­night khârna inkhawm hi nimin khan Health Services directorate con­ference hall-ah neih a ni a, Health princi­pal director Dr F Lallianhlira'n a kaihruai. Aizawl Civil Hospital Eye department HoD Dr Enghmingliani'n report a pe a, NHM mission director Dr Lalrozama pawhin thu a sawi. Mi mit pek dawngtu (corneal transplant dawngtu)-te'n thu an sawi bawk.

NPCBVI state prog­ramme officer Dr Lal­remmawii tarlan danin, kumina Eye Donation Fortnight chhungin state-ah leh district hrang hranga sikul, college leh hmun dangahte awareness neih niin, mit donate tura intiam thei zawn a ni a; Fortnight chhungin mi 1,145 chu mit pe turin an intiam a ni.

Kum 2017-18 chhunga mit pe mi 47 chhungte hnenah chawi­mawi­na thuziak (certifi­cate) sem chhuah a ni a; kum 2017-18 bikah July 19, 2018 thlengin mitthi tawhte aṭangin an mit darthlalang (cornea) 40 lak a ni tawh a, mit darthlalang 15 thlaksak an ni tawh.

Aizawl Civil Hospital-ah July 31, 2008-ah Eye Bank hawn a ni a, hawn a nih aṭanga September 6, 2018 thlengin thih hnua mit pe tura intiam mi 5,368 an tling tawh a; mit thlak ngai inziak lut mi 314 an awm. Tun thlengin thih hnua mit pe tawh hi mi 348 an awm a; mi darthlalang (cornea) 690 thlak a ni tawh bawk.