KHAWTHLIR

Thisen pe
Lungleia All India Radio leh Doordarshan-a thawkte chuan Lungleia AIR leh DD din champha pualin nimin khan Lunglei Civil Hospital-ah thisen unit 12 an pe a, a petute mipa 11 leh hmeichhia pakhat an ni. Physiotherapy Association of Mizoram din champha lawm nan an member mipa panga leh hmeichhia pahnihte'n Aizawl Civil Hospital-ah thisen unit sarih an pe bawk.

Bus tlan dan
Traffic SP H Ramthleng­liana chuan thupek chhuah­in, Aizawl khawpuia lirthei che vel a felfai zawk nan Sihphir bus tlan dan vawiina hman ṭan turin a tidanglam. Rua­hmanna tharah chuan, Bawngkawn aṭanga Chaltlang kaltlang­a Chan­mari kâwna kual ṭhinte chu Bawngkawn aṭangin Ramhlun kaltlangin Chanmari-ah kualin Bawngkawn via Chal­tlang-ah an tlan ṭhin tawh ang. Chanmari Ramhlun road-a Sihphir bus stand chu an hmang chhunzawm thei dawn a ni.

MLA-in sem
Aizawl East-I bialtu MLA R Lalrinawma chuan nimin khan Zemabawk North, Sihphir, Sihphir Venghlun, Ṭhuampui leh Zuangtui YMA-te hnenah MLA fund aṭanga a lei oxygen concentrator a sem. R Lalrinawma chuan, MLA fund chu a bial chhung veng hrang hrang mamawh inṭawm siam nana hman a nih thu a sawi.

PRISM candidate
PRISM party chuan nimin khan Mamit district-a Dampa bial chhunga West Phailengah street campaign an nei a; an president Vanlalruata chuan, kumin Assembly inthlana Dampa constituency-a PRISM candidate tur chu Lalrinzuala Chawngthu a nih thu a puang. Lalrinzuala hi Kânghmun khaw chhuak, Nursery Veng, Aizawla khawsak mek a ni.

BJP Thalai President
BJP, Mizoram Pradesh chuan nimin khan an party pisaah political session an hmang a, an president Prof. JV Hluna chuan Mizoram BJP ṭhalai president atan Malsawmtluanga, Zarkawt ruat thar a nih thu a puang. Malsawmtluanga chuan, Mizoramah hmasawnna tak tak a thlenna atan Congress leh MNF ni lo sorkar thar a ngai nia sawiin, "Chumi chhanna tura ka ngaih BJP hi belh tlak leh rin tlak a ni tih ka chiang a ni," a ti.