Mi thlan tihtlak kan tum - Vanneihtluanga

Ṭangrual pawl Zoram Peoples’ Movement (ZPM) adiviser Vanneihtluanga chuan nimin khan ZPM pisaa inkhawmah thu sawiin, hna hlâwk leh zuala thawk turin mipui thlan tihtlak an tum thu a sawi.

Vanneihtluanga chuan, “Keini'n kan tum chu hna ṭha, hna hlâwk leh zual thawk turin mi thlan tihtlak kan tum. Kut kuangkuaha engmah thawk loa ṭhu dulkiar turin engtik laimahin keini hian thu kan fah ngai lo ang, chutiang a ṭul dawn a nih chuan kan inhnûkdâwk ang," a ti.

Lengzem Editor chuan, “Keini chuan thahrui kan zawng, Mizo pa hian thahrui a nei tur a ni kan ti a. Mizo pa thahrui nei loa zangthala mu dulkiar ringawt tur hian he rama Kristiante hi chhandam kan ni lo. Chumi tur chuan vote aṭangin bul kan ṭan a ngai. An ngaih ngaihin min ngai rawh se, he thu hi kan tlanchhiatsan ngai dawn lo, Kristian ngaihtuahna pêl thil a ni. A tak takah chuan inbum hlawm tawpna thil a ni," a ti a; hna thawk loa ei ringawt hnam ding chhuak an awm ngai lo tih a sawi.

Vote thlaktu rilru puthmang chungchangah ZPM Adviser chuan, "Ṭha kan tih, candidate vote tlin tum aiin, a tling tur ngei tu nge ni ang kan ti tlat a. Miin an vote tlin tur vote belh tumin neutral-te pawh, chu ât-hlo hmang chuan setana hian a bum nasa em em. Kan tihfuh loh lianpui chu, 'Tu nge tling ang' tih kan ngaihtuah tlat mai hi a ni," a ti.

Vanneihtluanga chuan, "Tu nge mi ṭha, tu nge kan ram hi hruai thei ang, engtin nge kan rama dik lo hi kan chinfel ang, tih lam ngaihtuah loin, tu nge tling ang aw tih kan ngaihtuah tlat mai hi setana’n min bumna a ni," a ti a; chutiang thanga âwk lo turin Mizoram mipuite'n mawhphurhna an neih thu a sawi.