Code of Conduct puan hmaa NLUP sem zo turin hriattir

Chief minister Lal Thanhawla chuan nimin khan Congress Bhavan-ah thu a sawi a, "Model Code of Conduct puan a nih hmaa NLUP sem zo vek turin line department-te kan hrilh tawh," a ti.

NLUP chu sorkar laipui lamah an hêk hneh loh avangin, hmeichhe pakhat kaltlangin MNF-in Court-ah NLUP an hêk leh nia sawiin Lal Thanhawla chuan, "An stay an ti a, an stay lo. A sem dan ṭha tak nei sela Court chuan a ti a, guideline ṭha tak kan nei sa. Kan tih hmaih erawh chu gazette-ah kan chhuah lo," a ti a; gazette-a chhuah loh chu thil pawimawh lutuk a ni lo niin a sawi.

MIMER chungchangah Lal Thanhawla chuan, "MIMER-ah hian MNF kuhmûma pàr hi tlàwma lak tur a ni lo. Mahse, an kuhmûm hi a va chhe awm ve, kum 10-ah pawh a pár lo. A ngêt em ni tih zawhna a awm thei," a ti.