Sailama Birders Cottage hawn a ni

Sailam khuaa nungcha leh ramngaw humhalhtu, Sailam Ecological Conservation Society (SECS) leh khaw mipuite'n an khaw rama nungcha leh ramhmulte ena zir chiangtute thlenna tura an sak, ‘Birders Cottage’ chu nimin khan minister KS Thanga'n a hawng.

Birders Cottage sak nan hian Rs. 2,44,600 an hmuh bakah, mi hrang hrang aṭangin cheng nuai thum chuang hu bungrua an dawng a, hnatlang thâ 200 an séng bawk. Cottage hi nungcha leh ramhmul thlai zir chiang duh leh an mawina ena kalte tana man chawia thlenna tur a ni.

Sailam Ecological Conser­vation Society hi August 2, 2015-ah din a ni a; an khaw ram chhunga nungcha, thing leh maute humhalhna kawngah hma an la a, sava awmte chhinchhiahin, sava chi hrang 210 chuang an chhinchhiah tawh a ni.