Employability enhancement training buatsaih

Polytechnic zirlaite'n hna an zawnna kawnga tuaihriamna leh work culture zirtirna tura buatsaih, Employability Enhancement Training Programme (EETP) chu nimin khan Womens’ Polytechnic, Aizawlah neih a ni a, Womens’ Polytechnic principal FVL Biakchhawna'n a hawng.

EETP hi All India Council for Technical Education (AICTE) leh Chennai-a hmunpui nei ICT Academy ṭangkawpte'n polytechnic zirlai pass chhuak turte tana an buatsaih a ni a, thla khat chhung a awh ang. Zirlaite chu Mizoram chhung leh páwn hmun hrang hranga hna thawk thei tur leh ṭawng lamah pawh harsatna an neih lohna tura zirtir an ni dawn a; an hna tur zawnpui an ni dawn bawk.

Employability Enhancement Training Programme hi kum tin buatsaih a nih theih nan Women's Polytechnic, Aizawl leh ICT Academy chuan thawh dunna thuthlung an ziak tawh. Womens’ Polytechnic-ah hian diploma course pali a awm a, an zirlai chhuakte hna zawn kawnga puitu Placement Cell neiin, Mizoram chhung leh páwnah, India ram páwn thlengin an intír chhuak ṭhin a ni.