YMA-in kut an silsan hnuah Champhai ṭhalaite'n 'Dikna tun din kawngzawh' an nei

Champhai District NGO Coordination Committee bultumin nimin khan Champhai DC Maria CT Zuali sawnna thupek sût phûtin Champhai khawpui chhungah kawng zawh a ni. Tarlan tawh angin, Champhai District NGO hmalaknaah hian YMA Sub-Headquarters, Champhai an tel ve tawh lo.

Kawngzawhah hian Champhai District NGO Coordination Committee-a tel pawl hrang hrang hruaitute'n thu an sawi a, "Sorkar kan do lo a, sorkar lamah kan ṭang zawk. Champhaia dikna rah beh tung ding leh tura hma la kan ni. India sorkar leh Mizoram sorkar thuchhuah bawhzuia Kelkang dáia Champhai DC-in Myanmar aṭanga dan loa lak luh kuhva a man chungchangah mi dik lo zawka ngaihin FIR a thehlut ngam hi Champhai mipuiin lungawi thlak loh kan ti a ni," an ti.

Champhai NGO hruaitute chuan, Champhai DC khawih che lo tura sorkara an ngen hnu lawka DC sawn chhuah a ni chu mi dik zawk chunga action lakna nia an ngaih thu sawiin, "Champhaiah diknain rorel se tih hi kan duh ber. Kuhva leh DC transfer ngawr ngawr hi kan do a ni lo a, dikna rah beha a awm hi kan do ber a ni," an ti a; mi pamham leh dik lo zawkte'n Champhai mipui an palzût an phal ngai dawn lo tih an sawi.

Dan hnuaiah dik taka sumdawnna a kal theihna atan hma la turin sorkar an phût tih sawiin NGO hruaitute chuan, "Ramria insumdawn tawnna hi Champhai mipuite'n dik taka a zár an zo theih hi kan duhthusam a ni," an ti.

NGO hruaitute chuan, sorkar aṭangin thu a chhia a ṭha an la dawng lo chu lungawi thlak loh an tih thu sawiin, "Kan duh a hlawhtlin hma chuan ke kan pên zel dawn. Sorkar aṭanga thu lawmawm kan dawn hma chuan DC sawn chhuahna order sût tura sorkar kan nawrna kawnga hmalakna tura ruahmanna kan siam tawhte kaltlangpui zel kan tum," an ti a; an thil duh a hlawhtlin ngei theihna atan theihtawp an chhuahzel dawn thu an sawi hlawm.

Kawng zawhnaah hian mi pamhamte'n ram leh hnam an thunun an phal loh thu te, mi dik lote hmaah Champhai an tlàwm dawn loh thu te, sorkar thupek kengkawh ngam Champhai DC transfer order sût nghal tura sorkar an phût thute an tlangaupui a ni.

Champhai DC sawnna thupek sût phût hian January 21, Zirtawpni khan Champhai khawpuia dawr zawng zawng khâr a lo ni tawh. Ruahmanna ang chuan vawiin hian Champhaia sorkar pisa zawng zawng khâr a ni dawn a, naktukah total bandh huaihawt a nih bakah Republic Day boycott a ni ang.

Champhai District NGO Coordi­nation Committee hruaitute chuan, an duh tihhlawhtlin a nih loh chuan an thil tumte chu kaltlangpui ngei an tum thu an sawi a ni.