Kuhva phur lirthei dang lo turin Champhai police-te hrilh an ni? Thupek kan nei lo hrim hrim - IGP

Champhai district executive magistrate Esther Leihang chuan December 17, 2021 khan Champhai District Magistrate hnenah magisterial investigation report a thehlut a, kuhva phur lirtheite dang lo turin Police Headquarters (PHQ), Aizawl lamin Champhai police-te an hrilh thu a tarlang. Executive Magistrate report hi tun hnaiah social media hrang hrangah a darh a ni.

Hetih lai hian, Mizoram police-a inspector general of police (IGP - Hqrs.) John Neihlaia chuan, kuhva phur lirthei dan loh tura tih chungchangah Champhai police-te thu (instruction) an pek loh thu a sawi.

Champhai Executive Magistrate chuan Champhai DC hnenah hian, "Ṭawngkaa instruction min pek angin December 17, 2021 khan kuhva phur lirthei veivah dan chhui turin Khankawn checkgate ka tlawh a. Hemi chungchangah hian Champhai police-te chuan Police Headquarters aṭanga thu an hmuh avangin kuhva phur lirthei hi an level-ah chuan an tihdin theih loh thu leh lirtheite kaltlangtir tura tih an nih thu min hrilh a ni," a ti.

Executive Magistrate report chungchanga Vanglaini palai zawhna chhangin IGP John Neihlaia chuan, kuhva phur lirtheite kaltlangtir chungchangah Champhai police-te instruction an pek loh thu a sawi a, "Hetiang thilah instruction pek chi a ni lo hrim hrim," tiin, Champhai Executive Magistrate report chu an hriatthiam bik loh thu a sawi.

John Neihlaia chuan, Champhai Executive Magistrate-in Khankawna police checkgate a tlawh tih an hriat thu sawiin, "Thingpuite chu a in a, mahse, eng mah investigation ang zawnga a tih a awm lo. Investigation ti tura kal a ni tih pawh an hre lo," a ti.