Aizawl dist-a khua/veng 25 red zone-ah dah

Aizawl district magistrate Dr Lalhriatzuali Ralte chuan Aizawl district-a khua leh veng 25-te chu tun hnaia hripui lên nasat zualna hmun a nih avangin Covid-19 red zone-ah a dah. Red zone khua/venga chêngte chu fimkhur lehzual tura ngen leh hriattir an ni.

Sorkar thuchhuah tarlan danin, Aizawl district-a red zone puan khua leh vengte chu January 11-18, 2022 chhunga Covid-19 vei hmuh tamna khua, positivity rate 10% aia sángte an ni a; hripui lên dan (prevalence rate) chu positivity rate leh mihring cheng zat aṭanga chhût ṭhin a ni.

Red zone-a dahte chu hripui ṭâi darh dan azirin bialtu chief medical officer-in ṭul a tih chuan containment zone emaw, restricted area emawa puan rawtna a thlen thei a, chu chu a ṭul angin district administration-in an bawhzui ṭhin a ni.