KHAWTHLIR

Farmers Award hlân
Agriculture Technology Management Agency (ATMA) chuan nimin khan Lungleia Agriculture conference hall-ah tomato chìn dan inzirtirna an buatsaih a, tomato chi an sem nghal bakah, loneitu thawk ṭha thlan mi pali hnenah Farmers Award an hlân. Award hi C Lalnunmawia, Serkawn, Zosangliana, Thénhlûm, Lalengmawia, Cherhlun leh Vanlalnghaka Sailo, Lungsen khuate hnenah hlan a ni a; award hian thuchei leh Rs 10,000 a keng a ni.

Naute lawmpui
Beti Bachao Beti Padhao (BBBP) hmalaknain Serchhip district Mahila Shakti Kendra-a thawkte chuan nimin khan National Girl Child Day, 2022 pualin Serchhip District Hospital-a nau piang hmeichhia pali hnenah lawmpuina Rs 2,000, thuchei, BBBP t-shirt leh mawza bun khat ṭheuh an hlàn.

Financial camp
National Girl Child Day 2022 pualin nimin khan National Bank for Agriculture and Rural Development (NABARD) chuan GM High School, Champhaia zirlai hmeichhiate tan bank awmzia leh hman ṭangkai dan te, bank kaltlanga hamṭhatna awmte inzirtirna, Financial Literacy Camp an buatsaih. NABARD Champhai DDM H Lalhmachhuani'n bank hmalaknate leh education loan lak theih dante a hrilhfiah a ni.

SRH-ah MP dah
Lok Sabha MP C Lalrosanga chu Covid-19 vei a ni tih January 23, Pathianni khan hmuh chhuah a ni a, a taksaah natna a lan chhuah avangin nimin khan enkawlna ṭha zawk dawng turin State Referral Hospital-ah dah luh a ni.

Kawng enfiah
Adviser to chief minister (Technical) K Lalsawmvela chuan January 21-22, 2022 chhung khan Mizoram khawthlang lama kawng siam lai mekte a en. MNF thuchhuah tarlan danin, K Lalsawmvela hian NH-6 Kawnpui-Khamrang kawng siamtu Sadguru company chu an hun neih chhung ngeia thawk zo turin a hrilh a, Bairabi-Zamuang kawng siam mek leh Teirei lei dawh thar mek a en a, chak zawka hna thawh dan tur a sawipui.