National Girl Child Day hman a ni

Social Welfare minister Dr K Beichhua chuan nimin khan National Girl Child Day puala Women & Child Development department-in short film an siam, ''Importance of education for girl child' tih a tlangzarh.

Dr K Beichhua chuan, National Girl Chid Day chu kum 2008 aṭangin January 24-ah hman ṭhin a ni tih sawiin, "Hmeichhe naupang harsatna tâwkte ṭanpui leh dâwm kânna bakah, humhalh leh an dikna chanvo an chan theihna tura India ramin hma a lakna leh hriselna an neih nana chaw ṭha pek leh zirna an neih theih nana hmalaknate puala ni pual bik siam a ni," a ti.

National Girl Child Day chu mipa leh hmeichhe intluktlànna (gender equality) India rama a awm theihna tura buatsaih a ni tih sawiin Beichhua chuan, "Khawtlang leh ram changkangah hmeichhe dinhmun a hniam ngai lo a, hmeichhe dinhmun a sànna apiangah ramin hma a sawn chak ṭhin tih hre rengin kan society-ah pawh zir tur tam tak kan nei a ni," a ti a; politics-ah hmeichhe dinhmun hniam mah se, thil dangah mipa aiin hmeichhiate chetna a tam zawk avangin mipate inen lêt a ṭul thu a sawi.

National Girl Child Day pual hian Social Welfare department-in an lo tih ṭhin dan angin, damdawi-ina hmeichhe nau piang lawmpuina thilpek leh certificate hlanna hun hman a ni a; naupang huaisen chawimawina hlanna hun sorkar laipuiin webinar kaltlanga an buatsaihah an tel bawk.