MNF sorkar hnuaiah Mizoramin Mexico of the East a hnaih zel - ZPM Ṭhalai

ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; MNF sorkar hnuaiah Mizoramin Switzerland of the East aiin Mexico of the East a hnaih zel niin an sawi.

ZPM Ṭhalai hruaitute chuan, Champhai district-a Executive Magistrate-in Champhai DC hnena magisterial investigation report a thehluhah, Champhai police-te'n Police Headquarters (PHQ), Aizawl aṭangin kuhva phur motor-te chu kaltlangtir tura hriattirna an dawn avangin kuhva phur lirthei an tihtawp theih loh thu an sawi tih tarlan a nih thu an sawi a, "He thil hi lungchhiatthlâk kan ti," an ti.

Kuhva phurh titawp turin Ministry of Home Affairs-in order a chhuah tawh thu sawiin ZPM ṭhalaite chuan, "Home department pawhin kuhva phur motor-te lo dang turin December 2, 2019-ah order a chhuah ve leh a ni," an ti a; chuti chunga kuhva phur motor-te tlangtir tura PHQ aṭanga thupek siam a ni leh si chuan MNF sorkar hnuaiah dan rorelnain a lailum a luah zo tawh lo tih a tihchian thu an sawi.

ZPM Ṭhalai chuan, IPR minister Lalruatkima'n kuhva rahte chu DC man ni loin, sorkar man a nih thu a sawi tih tarlangin, "Hetiang a nih laia PHQ ruahmannaa kuhva tawlh rûk a ni reng si hian kuhva tawlh rûkah MNF hian lem an chang tih a chiang hle. Home Minister leh Commerce Minister-te'n ngawih an chuh tlat hi mak kan ti a, mahni hna tlin lo lutuk Home Minister hi báng ngei turin kan phût a ni," an ti.

Kuhva chungchanga Chief Minister-in statement a neih ve ṭhin chu Zoram mipuiin awih enah an en tawh lo nia sawiin ZPM ṭhalaite chuan, "MNF rorelna hnuaiah hian Switzerland of the East aiin Mexico of the East kan hnaih zel niin kan hria," an ti a; 'Pathian leh kan ram tân' titu MNF sorkar chu sual doa thisen chhuak khawp hiala bei turin Zoram mipuite'n an beisei tih an sawi bawk.

ZPM ṭhalai hruaitute hian kuhva tawlh rûk chungchangah nimin khan Home minister Lalchamliana a pisaah hmuh an tum a, an hmuh theih loh avangin press conference an nei zui a ni.