Health care hi SEDP-a kan programme Pawimawh tak pakhat a ni - Dr Thangtea

MNF adviser Dr R Lalthangliana, Health minister ni bawk chuan, health care chu SEDP-a an programme pawimawh tak pakhat a nih thu leh MNF-in sorkarna an chan kum khatna aṭangin an kalpui ṭan thu a sawi.

Dr R Lalthangliana hian nimin khan Mizo Hnam Runa inkhawmah thu a sawi a, “SEDP-a kan programme pawimawh tak pakhat chu health care hi a ni a, kan sorkar kum khatna aṭangin kan kalpui ṭan a, chhungkaw khat tan Rs. 2,00,000 kan kalpui mek a, Covid vanga bill la thei lo pawh an lâk thuai theih nan hma kan la mek. Covid leng karah SEDP kan kalpui ṭan dawn mek ta a ni,” a ti.

Kum 2023 inthlanpuiah MNF an sorkar leh ngei a beisei thu sawiin R Lalthangliana chuan, “Kum 2023 inthlanah Pathian leh mipui zarah kan sorkar leh ngei dawn a ni,” a ti a; majority an lâk ngai lohna LADC-ah an chak thu te, VC-ah MNF sorkarna a pian belh zel thu leh 78% chuangah sorkarna an siam tawh thu te, LC 83-ah MNF-in 74 an lak thu te, Sinlung Hills Council-ah seat 12-ah MNF leh HPC-te’n seat 10 an lak thute leh AMC inthlanah seat 19-ah seat 10 an lak thute a sawi.

Health Minister chuan, Covid-19 chungchangah Mizoram chu airport-ah checking ti hmasa ber leh India rama lockdown ti hmasa ber a nih thu a sawi a, “Omicron hi Mizoramah a la awm loin kan hria a, a awm tawh mai thei bawk. India ramah sample test-ah a ti ṭha ber kan ni a, 140% kan in test tawh a, state dangah chuan 10% hnuai lamte an test a ni,” a ti.

Mizoramah Covid-19 positive aṭanga chhûtin 0.38% chiah an thi tih sawiin R Lalthangliana chuan, “Thi zinga 80% hi natna khirhkhân cancer, zunthlum leh natna dang neite an ni a, thi tam ber hi kum 60 chung lam an ni,” a ti a; Lungleiah RT-PCR khawl tihfel a nih tawh thu te, Champhaiah bun thuai a nih dawn thu te, mobile RT-PCR van thar chu Lengpuiah hman thuai a nih dawn thute a sawi bawk.