Zoram Tharin Zo hnahthlakte Inpumkhatna beihpui thlâk tum

Zoram Thar Zofate Láirèlna Inpui chuan nimin khan Aizawl Press Club-ah thuthar thehdarhtute an kâwm a; Zo hnahthlak hmun hrang hranga awmte chu thlahtu bul thuhmun, Israel chhungkua (House of Israel)-a Manesia leh Ephraim thlah kal zelte an nia sawiin, kumin chhungin district hrang hrang leh ram páwnah Zo hnahthlakte inpumkhatna beihpui thlâk an tum thu an puang.

Zoram Thar hruaitu Zaichhawna Hlawndo chuan, Zo hnahthlawk hnam péng hrang hrangte chu India rorelna hnuaiah mi 18,00,000 vel, Myanmar-ah mi 5,50,000 vel leh Bangladesh-ah mi 1,80,000 vel an awm nia sawiin, “Pathianin a zawlneite hmanga Bible thianghlima a sawi lâwk angin Zo fate hi hnam khat kan nih angin rorelna pakhat hnuaiah kan la awm dawn a, chu ram leh hnam lo ding tur chu Kristian ram, Kristian hnam niin, khawvel tana êng, hnamte tana êng leh khawvel pum tana ṭawngṭaina inpui a ni dawn,” a ti.

Zaichhawna Hlawndo chuan, Zo fate hnam nihna puanna thuthlung ziak chu UN General Secretary, India, Myanmar, Bangladesh, Israel, United States of Ameriaca leh United Kingdom prime minister leh president ṭheuhte bakah, Mizoram, Manipur, Tripura leh Assam chief minister-te hnenah a ṭul anga hma la tura ngenna nen an pek dawn thu a sawi bawk.