Jan. 23-a Covid-19 positivity rate 34.07%

January 23, Pathianni khan Mizoramah Covid-19 vei mi 495 hmuh chhuah a ni a, positivity rate chu 34.07% a ni. Nimin khan hripui vei dam tawh mi 982 chhuahtir an ni a, hripui vangin mi pathum an thi.

Covid-19 vei Pathiannia hmuh thar 495-te chu mipa 206 leh hmeichhia 289 an ni a, RAT hmanga hmuh chhuah 493 leh FIA hmanga hmuh pahnih an ni. Mi 495 zinga 397-in symptom an nei a, 80.20% a tling. RT-PCR leh TrueNAT hmangin swab sample endik a ni lo.

IPR tarlan danin, hripui vei mi 10 aia tam hmuhna a awm nual a; Electric Vengah mi 23, Mission Vengah mi 19, Chhinga Vengah mi 16 leh Ngopaah mi 13 hmuh a ni. Sample endikna district pariata positivity rate chu 10% chung lam vek a ni a, a sanna ber Lawngtlai district-ah 60% niin, a dawttu Aizawl district-ah 45.29% a ni. Siaha, Champhai leh Khawzawl district-ah sample endik a ni lo thung.

Nimin tlai dar 5 thleng khan hripui vei dam tawh mi 982 chhuahtir an ni a; district tina chhuak zat chu - Aizawlah 315, Serchhipah 173, Khawzawlah 149, Hnahthialah 81, Lungleiah 67, Champhaiah 58, Kolasib-ah 47, Saitualah 38, Mamitah 32 leh Lawngtlaiah 22 a ni.

IDSP record angin, Mizoramah Covid-19 vei 1,60,148 hmuh chhuah a ni tawh a, mipa 76,509 leh hmeichhia 83,639 an ni a, mipa aiin hmeichhia 7,130-in an tam zawk. Nimin tlai dar 5 thleng khan mi 1,51,081 (94.34%) chhuahtir an ni tawh a, mi 586 (0.37%) thi tawhin, enkawl mek mi 8,481 (5.29%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,60,148 chu mi 1,000 zelah hripui vei mi 146 an awm ang a ni a; mi 1,00,000 zela Covid-19 vangin mi 53 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 23, 2021 thlenga swab sample endik tawh 16,21,740 aṭanga RT-PCR hmanga endik zat percentage chu 20.81 a ni a, RAT hmanga endik zat chu 73.42% a tling.