MPF leh party thawhhona thuthlunga Joint platform-in constituency a kâwk - MPF GS

Mizoram People Forum (MPF) general secretary Rev.Dr. R Lalbiakmawia chuan, MPF leh political party-te thawhhona thuthlunga 'Joint platform buatsaih loh ni se' tih chuan tun hma deuha constituency chhunga a duh duhin joint platform an buatsaih ṭhin chungchang a kawh deuh bik thu a sawi a, "Joint platform chungchang hi hrilhfiah chian deuh a ngai dawn niin a lang," a ti.

Tarlan tawh angin, Mizoram University Students’ Discussion Forum chuan September 4, 2018 khan MZU Auditorium-a Varsity Platform 2018 an buatsaiha a, political party tin president-te tel tura sawm an ni. Mahse, Congress President leh MNF President an tel lo a, an tel loh chhan chu MPF leh political party-te thawhhona thuthlungah MPF buatsaih a nih loh chuan joint platform dangah tel loh tur tih a nih thu an tarlang.

Zoram Peoples' Movement (ZPM) erawh chuan, Congress leh MNF party-te chhuanlam chu mipui bum tumna a nih thu leh, MPF leh party-te thuthlunga joint platform chungchang chuan inthlan puan hnu chauh a huam thu an tarlang thung.

MNF leh Congress party-te chhuanlam, joint platform chungchang hi Vanglaini palai chuan MPF general secretary Rev.Dr. R Lalbiakmawia a zawtfiah a; Rev.Dr. R Lalbiakmawia chuan, joint platform chuan constituency chhunga joint platform buatsaih ṭhin a kawh ber thu leh, political party pisaa an kal kualnaah pawh joint platform chungchangah zawhna a awm a, an inhrilhfiah thu a sawi.

Rev.Dr. R Lalbiakmawia chuan, joint platform chu inthlan puan hnuah party candidate-te tan an dinna constituency-ah buatsaih a ni ṭhin tih sawiin, "Candidate-te hian campaign-na hun an nei tam ṭhin lo a, chutih karah khaw inkar hla deuh takahte a changin joint platform nei tura ruahman a ni a, tel turin hun tam tak sen a ngai a. Chutih laiin, khaw ṭhenkhat, la tlawh loh khuate an nei bawk si a, an tan a buaithlak lutuk a, chuvangin, joint platform hi neih thawh loh mai ni se tih a ni," a ti.

Constituency bik chhunga joint platform neih tawh loh an rawt chungchangah, "Joint platform-a kalte hi party ruhkawl tak takte an ni hlawm a. Thusawi laia lo inauh buai leh mawi lo deuh hleka ṭawng ang deuhte a awm thei a, hei hi a ṭha tâwk lo deuh nia sawi a ni," tiin a sawi.

Constituency-a joint platform chu candidate-te'n an ṭhatpui chuang lo nia a lan vanga tihtawp rawt an nih bawk thu sawiin MPF General Secretary chuan, "Chuvang chuan, constituency level-a joint platform neih hi tih tawh loh mai ni se. State level-ah chuan MPF-in ṭul a tih chuan joint platform hi buatsaih mai se tih a ni," a ti.

MPF General Secretary sawi danin, MPF leh political party-te Thawhhona Thuthlung no. 7(1)-ah chuan, 'Inthlan puan a nih hnuah chuan Joint Platform hi neih loh ni se. MPF-in a ṭul a tih chuan state level-ah neih theih a ni ang a. MPF buatsaih a nih loh chuan Joint Platform-ah hian eng party mah tel tur a ni lo,' tih a ni. Chutih laiin, Thawhnona Thuthlung thuhmahruaiah, 'Tun aṭanga hman ni se' tih ziah lan a ni ve bawk.

Thuhmahruaia 'Tun aṭanga hman ni se' tih ziah lan chungchangah Rev. Dr. R Lalbiakmawia chuan, "Party office kan tlawh lai khan zawhna an siam a. Mahse, tuna sorkar programme kal mekte hi chu Election Model Code of Conduct-in a sawi angin, inthlan puan a nih hma chuan kan khap theih ni loah kan ngai," a ti a; Thuthlunga joint platform leh thil dangte pawh chiang zawka ziah a ngai dawna a lan thu a sawi.