Naupang inkhawmpui neih a ni

Mizorama kohhran pawl ṭhenkhat chuan nimin khan naupang sunday school inkhawm­pui an hmang. Naupang inkhawmpui hi pastor bial huapa neih a ni.

Presbyterian Kohhran chuan Beginner aṭanga Intermediate department-te'n pastor bial hrang hrangah inkhawmpui an hmang a, inkhawmpui thei lo bial tlem azawng an awm.

Aizawl pawn lam pastor bial ṭhenkhatah chuan September 7, Zirtawpni zana ṭan leh September 8, Inrinni chhuna ṭante pawh an awm. Naupangte chu cháng sawi, thu inchháng leh hla hmangin an intihsiak a; bial tam takah chuan special item-te neih niin, naupangte talent hai chhuahna remchang atan hman a ni.

Isua Krista Kohhran (IKK)-te pawhin Mi­zoram puma pastor bial hrang hrangah naupang inkhawmpui an hmang a; pathian thu inhriatsiak, zaipawl, thu inchháng, malzai, recitation-te hmangin an intihsiak. Bial tam takah chuan inkhawm­pui hi Zirtawpni zanah ṭan a ni a, nizan khan a ṭiak.

UPC (North East India) Kohhrante pawhin nimin khan naupang inkhawm­pui, Sunday School De­partment Conference an hmang a; Pathian thu leh hla hmang te, mimal inelna hrang hrang hmangtein intihsiak a ni. Thenzawlah chuan UPC (NEI) Puitling Sunday School-te chu khawhar hla hmangin an intihsiak a ni.