Poshan Abhiyan hnuaiah Mizoram sorkarin 2018-19 atan cheng nuai 351 a dawng tawh

Ministry of Women & Child Development-in anganwadi thuam ṭhatna atana a duan, Poshan Abhiyan Goal hnuaiah Mizoramin kum kal mek, 2018-19 atan cheng nuai 351 a dawng tawh a, bul ṭan nan Siaha leh Lawngtlai district-ahte kalpui niin, hmanrua eng emaw zat leh a ni tawh.

Social Welfare department (SWD) hotute'n Vanglaini palai an hrilh danin, Poshan Abhiyan hi Prime Minister-in March 8, 2018-ah a hawng a, India rama anganwadi zirlaite hriselna dinhmun, chaw ṭha an dawn dân leh thil hrang hrangah enkawlna turah kalphung thar a ni.

Anganwadi zirlai zingah naupang ṭhanṭhu tihtlem tum a ni a, thil hrang hrangah kalphung thar ṭha tak tak hmanga enkawlna pek tum a ni. Anganwadi zirtirtute chu an dinhmun hrang hrang Central-a an thawnna tur smartphone pek an ni dawn.

Poshan Abhiyaan siam chhan chu, India rama anganwadi-a kal naupang zingah ṭhanṭhu 38.4% an awm a, chu chu Poshan Abhiyaan hmangin 25%-ah tihhniam tum a ni. Scheme-ah hian naupang thisen tlachham, pian hlim aṭanga zâng lutuk, tâwi lutukte chu ngaih pawimawh an ni dawn a; naupangte'n chaw ṭha an dawn dan te, anganwadi enkawl dan te, thawktute hmalak zel dan tur te, chhungkaw inenkawlna leh thil pawimawh hrang hrangte pawh ngaih pawimawh tura tih a ni.

Poshan Abhiyan hi Mizoramah chuan kum 2018-19 ah chuan Lawngtlai leh Saiha district-ahte kalpui a ni a, a thawh hnihna aṭangin Aizawl, Mamit leh Champhai district-ahte kalpui leh a ni ang. Mizoram chuan sorkar laipui aṭangin cheng nuai 351 a dawng tawh a, hmanraw hrang hrang lei nan hman a ni tawh.

Anganwadi-a thawktute chu smartphone leh power bank pek an ni dawn a, zirtirtute chuan naupang dinhmun hrang hrangte chu Common Apllication System (CAS) hmangin Central-ah an thawn ṭhin dawn a ni. Tun ruahman dan chuan, smartphone hi 1,569 lei tum a ni a, company leh SWD hotute pawh an indawr mek.

Naupang san zawng tehna ṭha tak lei a ni tawh a, naupang la ding thei chiah lo pawh mu chunga tehna tur hmanrua pawh lei a ni tawh. Poshan Abhiyan atan hian ram páwn aṭanga ṭanpuina (externally added project) 50% chu Central sorkarin a dawng dawn a, Central sorkarin 45% a tum ang a, Mizoram sorkarin 5% chauh a tum ve dawn a ni.

SWD hotute sawi dan­in, kum 2018-19 ah hian Mizoram pumah anganwadi zirlai 1,52,593 an awm mek a, worker leh helper mi 4,488 awmin, an vaiin mi 1,57,081 an ni. Naupangte dawn tur chaw ṭha (nutrition) hrang hrang leina chu sorkar laipuiin 90% a tum a, state sorkarin 10% a tum thung. Kum khatah Central aṭangin cheng nuai 2000 vel leh state aṭangin nuai 200 vel an dawng tlangpui.

SWD hotute chuan, Mizorama khua zawng zawngah anganwadi an din deuh vek tawh tih an sawi a; kum kal mek 2018-19 atan Central-in sum a rawn pek tur zat a pawm chu nuai 2242.64 a ni a, chuta ṭang chuan nuai 1121.32 a rawn pe tawh a, Mizoram sorkar­in state matching share cheng nuai 51.21 a pe tawh tih an sawi bawk.