Governor-in MIMER leh Zokhua a tlawh

Governor Kummanam Rajase­kharan chuan, Inrinni khan Falkawna Mizoram Institute of Medical Education and Research (MIMER) leh Zokhua a tlawh.

MIMER-a thawktute nen an inkawmnaah Larsap chuan, MIMER chu Mizoram tana hlawh­tlinna lian tak a nih thu a sawi a, "Kan ram chhuan­vawr a ni. MIMER hi a boruak thianghlimin a hmun a fianrial a, damlote pawhin an ṭhatpui dawn a ni," a ti a; thawktute chu college bul tumtu an nih angin, ṭhangthar la awm zel turte'n an thawhrimnate chu an chhinchhiah reng tur thu a hrilh.

Governor chuan, natna hmuh chhuah thar laka mipui an him theih nan research ngaih pawimawh a ṭul thu a sawi a, "MIMER hi India rama college hmingthang berte zinga mi a nih theihna atan theihtawp chhuah ka tum a ni," a ti.

Governor hi MIMER director Dr Lallukhum Fimate leh Health & Medical Education director Dr T Lalhmangaihi ten an lo dawngsawng a, damdawi-in leh medical college hmunhmate an fanpui a ni.

Zokhua a tlawhnaah Governor hi Art & Culture department-a thawktute'n an lo dawngsawng a, Mizo in chi hrang hrang fanpuiin, a awmzia an hrilhfiah.