Youth centre changtlung tak kan din ang - Lalduhoma

Ṭangrual pawl, Zoram People’s Movement (ZPM) chief ministerial candidate Lalduhoma chuan, ZPM a sorkar hun­ah youth centre changtlung tak an din dawn a thu a sawi.

Lalduhoma hian Leng­teng constituency chhunga khaw hrang hrang a tlawhnaah September 7, 2018 khan Ngopaa ZPM Workers’ Meet-ah thu sawiin, "ZPM a sorkar hunah youth centre changtlung tak kan din dawn. Ṭhalaite tan ‘bána kaih’ (hand holding) policy kan nei a, Mizo ṭhalaite hi an kea an dinchhuah theih nan skill development te, capacity building te, entrepreneurship leh job counselling centre din kan ngai pawimawh dawn a ni," a ti.

ZPM sorkar hunah Brig. T Sailo ngaih pawi­mawh Six Basic Seeds tihhlawhtlin a nih tur thu sawiin Duhoma chuan, "Power-a kan intodelh theih nan hydro electric power leh solar energy ṭang kawpin Mizoram mamawh intodelhtir ngei kan tum," a ti a; Mizoramin Congress leh MNF damdawi an ngeih lo tih sawiin, damdawi thar, kalphung thar tiamtu ZPM thlawp turin mipui a sáwm.

Lalduhoma chuan, nau chu a paitu ngeiin a hrin a ngai ṭhin tih sawiin, sawhthing chu Congress leh MNF nau pai a ni lo tih a sawi a, "Mahni thawh chhuah sum thianghlim la lut ang u. NLUP leh SEDP hi kan ram damna a ni lo. Kan hmaa inthlan awm turah hian mahni in vote chhuak ve tawh ila; sawhthing kg. khat Rs. 50-in, hmunphiah Rs. 100-in kan lei ngei dawn a ni,” a ti.

Inkhawmah hian ZPM general secretary Lal­muanpuia Punte leh ZPM aṭanga Lengteng bial vil mektu H Ginzalala te pawhin thu an sawi a ni.