KHAWTHLIR

CYMA-in dem
Central YMA chuan thuchhhuah siamin, Chakma tlangval pathum - Tuitang Chakma, Longpuinghat, Simon Chakma leh Sukromoni Chakma, Vaseikai khaw mi ve vete'n August 25, 2018 zana Chamdur-P khaw tleirawl pakhat Vaseikai khuaa an pawngsual rawn chu an dem tak zet thu an tarlang. CYMA chuan, Mizorama hnam dangin Zo fate chunga zahna nei loa râwvâ taka an che ṭhin chu pawmzam chia an ngaih loh thu sawiin, "Thil sual titute hi dan anga na taka hremna pe turin thuneitute kan ngen a ni," an ti.

MLA-in tlawh
Lunglei East bialtu MLA Joseph Lalhimpuia chuan Inrinni zing khan a bial chhunga Lunglei Ramthar Veng hall sak mek a tlawh a, hna chak zawka thawh a nih theihna atan official leh khawtlang hruaitute ruahmanna a siampui. Joseph Lalhimpuia hian Inrinni zing vêk khan Ramthar Venga Kendriya Vidyalaya School a tlawh nghal a; sikul hi cheng vbc. 23.85 senga sak tur a ni.

Thisen pe
Laipuitlang Branch KṬP leh Himali Pastor Bial KṬP-te chuan, Inrinni khan Laipuitlang Kohran Hall-ah blood donation camp an huaihawt a, Synod Hospital tan thisen unit 42 an pe a, a petute mipa 33 leh hmeichhia pakua an ni. Mara Thyatli Py (MTP) College Vaih Branch pawhin Inrinni khan Siaha District Hospital tan thisen unit 38 an pe a, a petute mipa 28 leh hmeichhia 10 an ni.

World Suicide Prevention Day
Vawiin, September 10 hian chawhma dar 11 aṭangin National Mental Health Programme bultumin Aizawl Press Club-ah, 'World Suicide Prevention Day' hman a ni dawn. He hunah hian MJA president Zonunsanga Khiangte khuallian a ni ang.

ACCJSU hruaitu
Aizawl City College Joint Students Union (ACCJSU) chuan Inrinni khan Govt. Aizawl College-ah khawmpui an hmang a, chawhnu lamah MJA kaihhruaina hnuaiah hruaitu thar thlangin, kum 2018-2019 chhunga ACCJSU president atan Lawrence Laltlanthara (PUC) leh general secretary atan Emmanuel Lalhmangaihsanga (J Thankima College) te an thlang.