IAS officer-te'n Chief Minister an kâwm
Indian Administrative Service (IAS), 2017 batch probationer zinga mi 23 chuan Mizoram an rawn tlawh a, September 8, Inrinni khan chief minister Lal Thanhawla chu a chenna banglaah an kâwm.
Chief Minister chuan, IAS officer-te chu ram rorelna fawng chelhtu pawimawh tak tak vek an nih dawn avangin khawi hmunah pawh awm se, an awmna state tan ṭhahnemngai taka thawk zel turin a chah a, "Hleih nei loa ro in rel zel theihna atan mipui rawngbawlna thinlung dik tak pu turin ka duh che u a ni," a ti.
IAS-te chu Mizoram leh Mizote chanchin tlangpui hrilhin CM Hawla chuan, "A bik takin ṭhalaite tana eizawnna kawng ṭha zawk hawng tura zirna lamah te, infiamna lamah leh thiam thil hrang hrang chher puitlinsak tura hmalak a ni," a ti a; Mizoram leh India hmarchhak state-te chu India ram state dangte aia danglamna an neih thu a sawi.
IAS officer-te chuan, inkawmna hun a pek avangin Chief Minister hnenah lawmthu an hrilh a; Mizoram chu nuam an tih thu leh a mi chengte'n khual thlen thiam an tih thu sawi.
IAS 2017 batch probationer 23-te hi AGMUT cadre mi paruk, Assam-Meghalaya cadre paruk, Manipur cadre pali, Nagaland cadre pali, Sikkim cadre pakhat leh Tripura cadre mi pahnih an ni.