Staff nurse leh police laknaa thil dik lo tih tumah sorkar puh

Zoram Peoples' Move­ment (ZPM) ṭhalaite chuan thuchhuah siamin, Health department-in staff nurse a lak tur leh Home department-in police assistant sub-inspector (ministerial) a lak turah dik lo taka thil tih tumna a awm niin an tarlang a, "Mizoram Congress sorkar hnuaiah rorelna dik luipui angin a luang lo," an ti.

ZPM ṭhalai chuan, July 31, 2018-a Health & Family Welfare department-in advertisement a chhuahah staff nurse 70 lak tura tih a ni tih sawiin, chumi atan chuan Recruitment Rules 1989 siam danglam a nih thu an sawi a, "Contract basis-a thawk mekte dah nghehna tur remchang zawnna mai niin a lang. Hetiang a nih chuan political fitness nei lo tan hna hmuh a harsa dawn hle a ni," an ti a; contract basis-a thawk mekte chu political fitness-a rawih an ni tlangpui tih an tarlang.

ZPM Ṭhalai tarlan danin, Home department hnuaia assistant sub-inspector (ministerial) post 15 hnawhkhat turin advertisement no. 53 of 2017 - 2018 of Dated Aizawl, the 6th October, 2017 chu chhuah a ni a; June 6-8, 2018 chhungin Physical Efficiency Test (PET) buatsaih a ni.

ASI lakna atan hian The Mizoram Police Manual, 2015 hman niin, mi eng emaw zat an tling tawh tih sawiin ZPM ṭhalai chuan, "Congress sorkar duhsak zawng mi ṭhenkhat an tlin zawh ve tak loh avangin a hnuaia mi ang hian dan ding lai an tidanglam a, PET chu August 6, 2018 khan RG Stadium-ah an tihnawntir leh ta a ni," an ti.

PET minimum requirement
# Test Item A hmasa zawk Tihdanglam
(June 6-8, 2018)
1. Km. 1 tlan Minute 4.23 Minute 5.00
2. Long jump Metre 2.7 Metre 2.7
3. High jump Cm. 90 Cm. 90
4. 100m. sprint Second 14.5 Second 15