INTACH-in Heritage Quiz an buatsaih
INTACH Mizoram Chapter chuan September 7, 2018 khan MPSC Examination Hall-ah sikul naupang, pawl 6-10 zirlaite tan India ram pum huapa intihsiakna, INTACH Heritage Quiz an buatsaih a, School Education director K Lalthawmmawia khuallian niin, zirlai 82 an tel.
Khuallian, K Lalthawmmawia chuan, naupangte tana mahni history, culture leh identity hriat chian a pawimawh thu sawiin, INTACH leh Directorate of School Education ten heritage quiz an neih ṭhin chuan heritage awareness nasa taka a thlentir tawh thu a sawi. Khuallian hian kum 2017-a Heritage Competition-a regional winner Harshit Sharma Thakur, Mount Carmel School hnenah trophy leh certificate a hlan a ni.
Quiz competition hi INTACH Mizoram Chapter convener P Rohmingthanga'n a kaihruai a, pipúte sûlhnu hriat chhian chu hnam humhalhna atan a pawimawh bakah, inelna (competition) hrang hrangah an pawimawh telh telh dawn tih a sawi a; INTACH-in quiz competition a buatsaih ṭhin chu naupangte tan an hun kal zel turah ṭangkai tak a nih tur thu a sawi.
Kumina Heritage Quiz-ah hian Angeline Lalpekhluii leh Lalhruaitluanga, St. Paul’s H/S-te chu a ti ṭha ber team an ni a; Vanlalhriati leh C Lalrinsangi, Mt. Carmel School-te chu pahnihna niin, Mt. Carmel School aṭanga tel dang Benjamin Vanlalropuia leh Lalremkima te ṭang dun leh Jonathan Lalhmingthanga leh Richie Avinav Rai te ṭang dun chu pathumna an ni. Pakhatnate hi New Delhi-a national winner zawnnaah Mizoram aiawhin an tel ang.