MNF hi sorkar tlak an ni tawh lo - Zodintluanga

Minister Zodin­tluanga, Congress Legislature Party-a treasurer chuan September 8, Inrinni zing khan Lawng­tlaiah LADC-a Congress MDC-te leh Lai District Congress Committee (LDCC) hruai­tute hmaah thu sawiin, "MNF sorkar laiin hnam ro tling tur an tichhe vek a, mipuiin an la theih­nghilh lo. MNF hi sorkar tlak an ni tawh lo," a ti.

Zodintluanga hian MNF sorkarin eirukna vanga ram ro tling tur an tihchhiatte a sawi lan rualin, Congress sorkar­in MNF tihchhiat tawh din thar leha a tihpuitlin tawhte a sawi lang a; MNF hotute chuan anmahni'n hlâwkna an hmuh chuan ram ro tling tur tihchhiat an hreh lo niin a sawi.

MNF chu a dintu leh president hmasa ber Lal­denga thih hnuah Zoram mipuiin majority an la pe ngai lo nia sawiin Zodintluanga chuan, "An Founder President awm loh hnuah kum 1998 khan PC nena ṭang dunin an sorkar a, kum 2003-ah MLA ṭhenkhat an uire vangin an sorkar ṭâwk bawk," a ti a; chutih laiin, Congress party chuan kum 2008-ah MLA 32 leh kum 2013-ah MLA 34 an neiin chiang takin sorkarna an chan thu a sawi a ni.