High Court-in NLUP a 'stay'

Gauhati High Court chuan nimin khan order chhuahin, Mizoram sorkar chu NLUP sem lo turin a hriattir a; NLUP thubuai chungchang ngaihtuah hun atan September 18, 2018 a ruat.

High Court order-a a lan dan leh thu dawn danin, petition thehluttu Vanramchhuangi ukil C Lalramzaua chuan nimin khan High Court-ah hian sorkarin NLUP sem tuma hma a lak avangin NLUP stay dilna (application) a thehlut a; High Court chuan nimin khan ngaihtuah nghalin, stay order hi a tichhuak ta a ni.

High Court order-a a lan danin, High Court-in August 3, 2018-a order a chhuahah, NLUP chungchanga guideline-te sorkar ukilte'n Court-a an thehluh hma chuan NLUP ṭanpuina chu sem rih lo turin a ti a; chumi hnu August 10-ah Mizoram sorkar chuan NLUP chungchangah notification chhuah a, August 27-ah Government Gazette chhuah leh bawkin, chu chu hman nghal tura tih a ni.

Thubuai thehluttu ukil C Lalramzauva chuan, sorkarin Gazette a chhuah hnuah NLUP ṭanpuina chu sem chhunzawm a tum niin an hria a, chutih laiin, notification-ah chuan NLUP dawng tur thlan dan (criteria) chungchangah guideline a awm chuan loh avangin, High Court-ah hian nimin khan stay application an thehluh tih a sawi.

Gauhati High Court Aizawl Bench judge Michael Zothankhuma order chuan, Gauhati High Court Division Bench-in August 3-a order a chuah tawh angin, NLUP dawng tur thlan danah criteria mumal tak Court-a thehluh a nih hma chuan NLUP ṭanpuina reng reng sem phal a nih loh thu a tarlang a ni.

Sorkar ukilte chu September 18, 2018-ah NLUP guideline leh pawimawh dangte thehlut tura tih an ni a; hemi ni hian thubuai pawh ngaihtuah zui tura tih a ni.