Mizoram State Anti-Tobacco Day hmang

Nimin khan Mizoram hmun hrang hrangah Mizoram State Anti-Tobacco Day vawi 5-na hman a ni. Aizawlah chuan Indian Society on Tobacco & Health, Mi­zoram (ISTH) leh National Tobacco Con­trol Programme, Mizoram (NTCP) bultumin Aijal Club-ah hman a ni a, minister John Rotluangliana'n a hmanpui. Thupui chu 'In chhung leh lirthei chhunga meizûk loh’ tih a ni.

Inkhawm hi MJA president Zonunsanga Khiangte-in a kaihruai a; John Rotluangliana chuan, Mizote'n meizûk nghei lamah hma an sawn hle tih sawiin, "Hei hi sorkar leh pawl hrang hrang hmalakna rah a ni. Ram leh hnam changkang zawkin vaihlo leh a kaihhnawih thil dang ṭhat lohna an inzirtir nasa a, keini hnam ṭhang mek pawhin kan ngaih pawimawh a ngai," a ti.

Motor Vehicle Rules 1989-a Rules 21(14)-in lirthei chhunga mei­zûk a khap tih sawiin Transport Minister chuan, "Motor Vehicle Rules 1995, Section 23(B) chuan lirthei khalhtute meizûk a khap tlat a, he dan bawhchhe tan pawisa chawi theih a ni a, an licence thlenga laksak theih a ni," a ti a; sorkar laipuiin lirthei khalh chunga meizûk a ngaimawh thu a sawi.

ISTH Mizoram president Lal Riliani pawhin thu sawiin, boruak thianghlim hîp chu mipui chanvo a nih thu a sawi a, "World Health Organisation chuan vaihlo hi hriselna tichhetu bul a ni tih a puang tawh. Meizûk a ṭha lo tih piah lamah, mi dang meizûk hîp phak nih thlengin a ṭhat lohna a nasa a, kan taksa a khawih chhe thei hle a ni," a ti.

Inkhawma tarlan danin, Mizorama vaihlo dona atana hma la turin April 1, 2009-ah Mizoram State Tobacco Control Society (MSTCS) din a ni a, hemi kum vek hian Smoke Free Mizoram kalpui a ni. February 10, 2010 khan Anti Tobaco Squad din a ni a, kum 2011-ah state leh district level-ah Anti-Tobacco Cell din a ni.

Vaihlo dona chi khat, Blue Ribbon Campaign chu kum 2012-ah kalpui a ni a, September 30, 2013-ah State Level Coordination Committee din niin Chief Secretary chairman a ni. August 26, 2013 khan Thingsul Tlangnuam chu Tobacco Free Village hmasa ber atan puan a ni a; kum 2014-ah 1st. Mizoram State Anti-Tobacco Day buatsaih niin, kum 2016-ah Point of Sale Board (PoS) Free Mizoram kalpui ṭan a ni bawk.

Global Adult Tobacco Survey (GATS) report-a a lan danin, kum 2009-10 khan Mizoramah meizu 67.2% an awm a, kum 2016-17-ah chuan 58.7%-ah a tlahniam tawh. GATS North East India 2016-17 tarlan danin, Mizoramah in chhunga meizu 84% awmin, hna thawhnaah 44% an awm. Mizoramah vaihlo hmang kum tinin an tlahniam zel a ni.