UPSC prelims paltlangte Rs. 1,00,000 Mains paltlangte Rs. 2,00,000 pe dawn

Mizoram Youth Co­mmission (MYC) chair­man Joseph Lalhimpuia, MLA chuan, kumin aṭang­in Mizo ṭhalai UPSC Civil Services Examinations preliminary exam pal­tlangte hnenah Rs. 1,00,000 leh mains exam paltlangte Rs. 2,00,000 pek an nih tur thu a sawi.

He thu hi Joseph Lalhimpuia hian nimina V Laltlanmawia 2nd. Solo Exhibition of Painting a hawnnaah a sawi a; Mizo ṭhalaite'n thiamna leh eizawnna dapna kawng zau zawk an neih theihna turin sorkarin nasa taka hma a lak thu sawiin, "District tinah SSC coaching kalpui thuai tum a ni a, sipai officer leh bank hna lak hrang hrang atan coaching ruahman a ni ang," a ti. Mizo zirlai tam zawkin NEET ṭha taka an paltlang theih nan hmalak tum a nih thu a sawi bawk.

V Laltlanmawia 2nd Solo Exhibition of Painting hian September 15, 2018 thleng a awh dawn a, lemziak 43 pho chhuah niin, a tam zawk chu water colour painting a ni.