Opposition-a kan awm hun a tawp hnai - Zoramthanga

MNF president Zoram­thanga chuan nimin khan Kolasib Diakkawna MNF party pisa thar a hawng a; thu sawiin, opposition-a an awm hun a tawp hnai tawh thu a sawi.

Zoramthanga chuan, tunah hian Mizoram mipuiin MNF chauh an sorkar an ring tawh nia sawiin, "Opposition-a kan awm hun a tawp hnai tawh. Congress a tlaka MNF a sorkarna chhan tur tam tak a awm a, India rama state 29-ah state pakhatah chauh an sorkar tawh a, an tla fai teuh tawh hle a ni," a ti a; kohhran leh NGO-te thu ngai pawimawh duh loin sorkarin zu an zawrh bakah, drugs a hluar hle niin a sawi.

Zoram Peoples' Movement (ZPM) chu party ni loin, forum chauh an nih thu sawiin Zorama chuan, "An hming chauh a ropuiin a lian a, an thusawi ngaithlatu pawh an inhmu zo mang lo. ZNP leh MPC awm tawh mang lote hi an innghahna an ni a, an tan sorkar siam ngaihna a awm lo," a ti.

MNF President chuan Congress chu nomination-ah an buai nghal tih sawiin "Keini chuan kumin January aṭang khan nomination kan siam a, Congress chuan hman ni lawkah siam vein an buai hle a, bul an ṭan ve chauh a, keini chuan kan zo ṭêp tawh. Nomination chungchangah ringawt pawh kan infelfai hleih hle a ni," a ti a; Mizoram BJP ho chu a lehlam pawlin an president lim an hâl niin a sawi.

MNF President chuan, MNF sorkar hunah SEDP hmangin mipui eizawnna ngêlnghet siam an tum thu sawiin, "SEDP-ah sum tam tak kan mamawh dawn tih kan hria a, keini chuan budget hi a chi-ah chauh kan hmang ang, Central-ah budget piah lamah sum tam tak a awm a, a hai chhuah dan kan hre em em a ni," a ti a; Congress sorkar flagship programme NLUP erawh chu budget aṭanga sem a nih thu a sawi bawk.

Zoramthanga chuan MNF-te tluka minority-te duattu leh hmangaihtu an awm lo tih sawiin, "Gorkhali-te pawh MNF sorkar laia an census kan pawm sak avangin LSC leh inhmun patta pawh Gorkhali ten Mizoramah an ti ve thei a, a bak pawh thiltihtheih chin chu tih zel kan tum," a ti a, Bru leh minority dangte pawh MNF a an beiseina nghat turin a chah.

MNF thuchhuah chuan, nimina Kolasib-a pisa thar an hawnnaah hian Kolasib district-a khaw hrang hrang aṭanga MNF zawm thar mi 212 an lawm lut niin a tarlang.