Bru lâk lêt hna chhunzawm tum a ni ; October-ah relief camp khâr a ni dawn

Ministry of Home Affairs-a joint secretary (NE) Satyendra Garg chuan October 2018 tìr lamah Tripura-a Bru relief camp parukte chu khâr a nih dawn thu a sawi. Hetih lai hian, Bru hruai kîr hna chu thawh chhunzawm a ni dawn.

September 10, Thawh­ṭannia Mizoram sorkar official, Mizoram Bru aiawh leh Tripura-a Bru aiawhte nen Secre­tariat conference hall-a ṭhutkhawmnaah Satyendra Garg chuan, October 2018 tìr lamah Bru relief camp-te khâr an nih tur thu a sawi. Ministry of Home Affairs hotute chuan, Bru refugee camp khâr a nih tur thu hi Tripura-a meeting-ah an lo sawi tawh bawk.

Vanglaini thu dawn danin, meeting-ah hian, relief camp-a awm mekte zinga Mizorama kîr duh an awm leh awm loh zawhfiah hnuhnung bera kîr tura inhriattir Kaskau camp-a chhungkaw 415 aiawhte chuan, hruai kir an nih hmain in sak lâwk an duh thu an sawi a, chu chu remtihsak a ni. Lak let an nih hnua in sak ṭanpuina an dawn tur Rs. 50,000 chu an kîr hmaa in an sakna atan pek lâwk a ni ang.

Meeting chuan, MHA, Mizoram sorkar, Tripura sorkar leh Mizoram Bru Displaced People Forum (MBDPF)-te'n inremna an lo ziah tawh angin, relief camp-a Bru-te Mizorama lak let hna chu thawh chhunzawm leh turin a ti a; hruai kir hna thawh ṭan hun tur erawh bituk a ni lo. Lak let hna thawhna atana ruahmanna awm saa thil ṭhenkhatte chu chu siam rem tura tih a ni.

Meeting-ah hian, relief camp aṭanga hruai kîr turte dawn ang dawn ve phûttu Mizorama Bru awm mekte'n an din, Equal Package Demand Committee (EPDC) chuan MHA Joint Secretary hnenah an thil phût chungchanga hmalakna an zawt a; relief camp-a awmte an kîr tam leh kîr tam loh azira ngaihtuah a nih tur thuin a chhang.

EPDC chuan, MHA Joint Secretary chhanna chu ngaihṭhat thlak loa an ngaih avangin a ṭul anga hmalak zel an tum thu thuchhuah siamin an tarlang a, "Chhawmdawlna package thar ber ang kan dawn hma chuan theihtawp chhuahin hma kan la zel dawn a ni," an ti.

Inremna ziah tawh angin Bru lak let hna chu August 25-27, 2018 chhung khan thawh a ni a, Bru chhungkaw pathum Mizoramah an rawn let. Rawn let zinga chhungkaw pakhat chu Lunglei district-ah dah an ni a, chhungkaw pahnih chu Kolasib district-ah dah an ni.

Tun dinhmunah Tri­pura-a relief camp parukah Bru chhungkua 5,404 an awm meka chhinchhiah a ni.