KHAWTHLIR

Thisen pe
Mount Carmel School chuan an sikul din champha vawi 31-na lawm nan nimin khan blood donation camp an huaihawt a, Aizawl Civil Hospital tan mipa 50 leh hmeichhia 11-te'n thisen unit 61 an pe. Bungtlang Bial ṬKP pawhin Serchhip District Hospital tan thisen unit 50 an pe a, a petute mipa 41 leh hmeichhia pakua an ni.

Faina hnatlang
Mara Autonomous District Council (MADC) office-a thawkte chu nimin khan Siaha khawpui chhung tifaiin an hnatlang. Hnatlang an ṭan hmain MADC office kawtah inkhawm tawi neih a ni a, hnatlang turte chu MADC executive member (LAD) MH Tiabi-in a vailiam a ni. MADC staff mi 600 vel chu hlawm 11-ah an inṭhen a; Siaha khawpui chhunga hmun hrang hrang an tifai a ni.

EVM training
Kumina Assembly inthlan­pui awm tura inbuatsaih nan nimin khan ATI Auditorium-ah electronic voting machine (EVM) leh voter verifiable paper audit trail (VVPAT) chungchang zirhona leh inhrilhfiahna hun hman a ni a; district election officer Dr A Muthamma-i'n a hmanpui. He hunah hian Aizawl North-I, Aizawl East-I, Aizawl West-I, Aizawl West-III biala BLO-te bakah, Aizawl South-III biala Saikhamakawn, Melthum, Hlimen, Lungleng, N. Lungleng, Samtlang, Hualngohmun, Melriat, Kelsih, Falkawn leh Muallungthua BLO-te an tel a ni.

Training buatsaih
Nimin khan Champhaia IPR auditorium-ah ni hnih awh tur training, 'Collection of U-DISE 2018-19, Post NAS intervention, CLIx and School Safety' tih thupui hmangin neih a ni a; Champhai district-a DEO, SDEO, DPC (SSA), higher secondary school principal, high school headmaster, BRCCS, CRCCS, MIS coordinator (SSA & RMSA)-te an tel. Thupui ṭhen hrang hrang - National Achievement Survey, Need for School Safety, U-DISE leh a dangte an zirho a ni.

Inrawn khawm
Food and Drugs Administration chuan nimin khan Serchhip Hmar Veng YMA Hall-ah damdawi lem leh ruihhlo chungchang leh ei tur thianghlim lo chungchang inhrilhhriatna leh inrawn khawmna an buatsaih a, FAD jt. director Lalsawma Pachuau-in a hman pui.