Innovation Hub & Space Education Centre hawng
Mizoram Science Centre, Berawtlanga Innovation Hub & Space Education Centre din thar chu chief minister Lal Thanhawla'n nimin khan a hawng. Innovation Hub & Space Education Centre sakna leh a chhunga khawl leh hmanrua hrang hrang atan National Council for Science Museums (NCSM) chuan cheng nuai 386 a sêng tawh.
CM Lal Thanhawla chuan, NCSM, Ministry of Culture leh Directorate of Science & Technology-te thawhona leh ṭhahnemngaihna vanga Mizoram mipui, a bikin ṭhalaite'n Centre ṭha leh ṭangkai tak hawn a ni chu lawmawm a tih thu a sawi a; Innovation Hub & Space Centre chu zirlaite leh a tlawhtu zawng zawngte'n an hman ṭangkai a, thianghlim taka vawng tur leh dimdawi taka an enkawl turin a chah.
Chief Minister chuan, Mizoram sorkarin kawng hrang hrangin ṭhalaite hmasawnna turin hma a la ṭhin tih sawiin, "Ram tana mi ṭangkai leh chhuanawm, ram innghahna tlak dik tak an nih theih nan an thiamna leh talent-te hai chhuahsaka tihhmasawn bakah, an tuina kawng an zawh theih nan remchanna siamsak zel hi sorkar duh dan a ni," a ti.
Khualzahawm Lalsawta, Finance minister chuan, Innovation Hub & Space Education Centre avangin Mizoramin science leh technology khawvelah bung thar a kai tih sawiin, "Science thiamnaah Mizoramin rual a pawl ve tawh viau a ni," a ti a; hub leh centre chu zirlaite'n an hman ṭangkai dawn thu a sawi.
Innovation Hub & Space Education Centre hawnna inkhawm hi chief scientific officer Dr RK Lallianthanga'n kaihruaiin, Planning Board vice chairman H Liansailova pawh a tel. A hawnna inkhawm zawhah Innovation Hub & Space Education Centre chhunga planetarium-ah show an enho nghal a ni.
Innovation Hub & Space Education Centre sakna leh a chhunga khâwl leh hmanraw hrang hrang atan NCSM chuan cheng nuai 386 a sêng tawh a, NCSM chuan Innovation Hub chu kum thum chhung enkawlna tur a tum tel bawk dawn. A sak hna chu Mizoram PWD hnuaiah thawh a ni a, Innovation Hub bik hian ram metre 300 bial a awh a, Space Education Centre zau zawng chu metre 113 bial a ni thung.
Innovation Hub hi high school leh higher secondary school, polytechnic leh ITI zirlaite'n khawl leh thil hrang hrang siam dan taka an hman leh zir theihna tura duan a ni a; Physics, Chemistry, Biology Mechanical, Electrical & Electrinics laboratory-te leh lecture room-te awm bawkin, Innovation Resource Centre, Thod-Phod Jod, Robotics Section, 3D Printer, Hall of Fame leh Multimedia Kiosk te a awm.
Space Education Centre chu zirlai leh a tlawhtu mipuite'n van lam chanchin an zirna tur leh hriatna tizautu tura siam a ni a; metre 8 diameter dome niin, mi 51 ṭhut lenna a ni. Film show pariat leh planetarium show pali chhuah theih a ni a; planetarium show hi vawi khatah zirlai tan Rs. 30 leh mipui vantlang tan Rs. 50 man a ni.