Congress-in MIMER leh THEPP an lawm dawn

Mizoram Pradesh Congress Committee (MPCC) chuan naktuk, Ningani hian Falkawnah Mizoram Institute of Medical Education and Research (MIMER) leh Tuirial Hydro Electric Power (HEP) an lawm dawn.

MIMER leh Tuirial HEP lawm tur chungchangah hian nimin khan Falkawnah organising chairman, Health minister Lal Thanzara'n thuthar thehdarhtute a kâwm a, "MIMER hi official-in kan hawng tawh a, party anga a hranpaa lawm hi party office bearer leh Congress Legislature Party chuan ṭha an ti a, Tuirial HEP hi lawm tel nghal rawt a ni," a ti.

Lal Thanzara chuan, MIMER leh Tuirial HEP an lawm turah an party mite an phûr hle nia sawiin, "Lawmawm zual em em chu, Congress sorkarin a bul ṭan, kan awm loh hnua a nih tur ang ni lo, kan awm leh hnua puitling ta a ni," a ti a; a lawmna senso atan party worker-te'n sum an thawh khawm thu a sawi.

MIMER leh Tuirial HEP lawmna atan hian sorkar sum hman a nih dawn loh thu sawiin Lal Thanzara chuan, "Minister, MLA leh party worker-te'n phûr takin pawisa an thawh khawm a, tunah hian cheng nuai 30 chuang a tling khawm tawh. A ropui thei ang bera lawm kan tum a, mi 7,000 vel ei tur ruai kan siam dawn a, mipui lo tel vek turin kan sawm a ni," a ti.

Organising vice chairman KS Thanga, bialtu MLA chuan, an thil lawmna turah mipui pungkhawm an tam dawn thu sawiin, "Khawtlangin an hmunhma hman min phalsak avangin kan lawm hle. Mipui tana harsatna awm lo tur ang berin hun hman kan tum," a ti a; lirthei veivak a tam vanga harsatna a thleng palh a nih chuan mipui hriatthiamna an ngen lâwk thu a sawi.