Minister-in in sak ṭanpuina a sem

Minister Zodin­tluanga chuan nimin khan a bial chhung, Lungsen RD Block huam chhunga chhungkaw 56-a mite hnenah Chief Minister Housing Scheme aṭang­in in thawm ṭhatna tur ṭanpuina Rs. 50,000 ṭheuh leh RD department hnuaia Rural Housing Scheme aṭangin chhung­kaw 21 hnenah rangva bandel li ṭheuh a sem. 

In sak ṭanpuina hi Lungsen BDO pisa kawt­ah sem a ni a; Zodin­tluanga chuan, Mizoram sorkarin mipui harsatna hriain scheme ṭha tak tak a duang tih sawiin, "In sakna bik hi sorkar laipui hian nasa taka kalphung a thlak avangin harsatna in tâwk a. In sak ṭanpuina PMAY pawh a thlan dan thlakin, survey an neih pawhin in lo hre lo ṭhin a, hei vang hian state sorkarin scheme hran a siam a ni," a ti.

PHE Minister chuan, a thlawna thil dawnte a nihna dik taka hmang tura infuih nasat a ngaih thu sawiin, "A thlawna kan dawnte hi hralh leh mai chíngte kan awm ṭhin a, kan rilru kan siamthar a, a ṭha lam hawia ngaih­tuahna kan sên a hun tawh," a ti a; in thawm ṭhatna tur rangva leh pawisa dawngtute chu pek an nih chhan ang taka hmang turin a chah a ni.