RD Block phûtin Tlabungah kawngzawh
Tlabung RD Block Demand Committee (TRDBDC) huaihawtin nimin khan Tlabung leh a chhehvel khuaa mipuiin Tlabung RD Block siam phûtin Tlabungah kawng an zawh a, mi ṭhahnem tak an tel. Kawng zawhnaah hian mi 1,200 vel an tel a; resolution pass in, Tlabung RD Block a pian hma chu hmalak zel an tum thu an puang.
Kawngzawh ṭanna inkhawm chu TRDBDC treasurer Vanlalruata Sailo-in a kaihruai a, BCM Tlabung bialtu pastor Rev. Lalmuanawma Sailo-in hunserh a hmang. TRDBDC aiawh bakah, Tlabung khua YMA branch hrang hrang hruaitute leh khaw Nunsury Zone YCA hruaitute'n thu an sawi.
TRDBDC chairman C Vanlalhruaia chuan, Tlabung RD Block siam phûta kawng zawh a ngai ta chu vanduaithlak a tih thu sawiin, sorkar thuneitute'n Tlabung leh a chhehvel an ngaihsak tawk loh vang a nih thu a sawi a, "Sorkar nawr kal tura mipui kan pên chhuah hun a inher chhuak ta a ni," a ti. An hmalak zelna turah ṭawiawm zel turin Tlabung leh a chhehvel khaw mipuite a sawm a ni.
Kawngzawhnaa resolution
1. Tlabung RD Block siam a nih theih nan hun rei tak kal ta aṭanga hmalak ni tawh mah se, tun thlenga pek kan la ni lo hi Tlabung leh a chhehvel khaw mipuite'n pawi kan ti a; kan ramah hawihhâwm taka sorkar dàwrin awmzia a nei ngai ta lo hi pawi kan ti.
2. Rural Development department hi thingtlang leh hmun kilkhawr zawkte chàwikàn leh dàwmkànna tur a nih laiin, a mamawh bertute zinga mi - Tlabung leh a chhehvel mipuite tan vawiin thlenga block hran siam a la ni lo hi runthlâk kan ti a, ramria mipuite hmuhsitna leh thamlohnaah kan ngai.
3. Kawng hrang hranga thlirin, Tlabung leh a chhehvel khuate hian RD Block hran kan phú a; RD block kan mamawhzia leh kan phùzia keini aia hrechiang zawktu Mizoram sorkar hian a rang thei ang berin Tlabung RD block siam rawh se.
4. Tlabung RD block siam kan ngiat leh phût kawngah, Tlabung leh a chhehvel mipuite chuan, eng political party mahin hamṭhatna an zawn rem kan ti lo a; Tlabung leh a chhehvel mipuite'n kan mamawh ngiatin inlungrual takin hma kan la zel dawn.
5. Tlabung RD block a pian theihna tura Tlabung RD Block Demand Committee hmalakna hi a tàwp thlenga thlàwp zel kan inhuam a; a ṭûl a nih chuan, kumina Assembly inthlanpui lo awm turah aiawh thlanga vote thlâk loh thlengin kan inhuam a ni.