JNU-a buaina chhuak sawifiah

Jawaharlal Nehru University (JNU), Mizo Forum chuan thuchhuah siamin, tun hnaia JNU, New Delhi campus-a buaina chhuak chungchang an sawifiah.

JNU Mizo Forum tarlan danin, October 2019 aṭanga JNU Inter Hall Administration (IHA) inkaihhruaina dan tihdanglamah hostel fee eng emaw zata tihsan a ni a, chuvang chuan JNU Students’Union (JNUSU) chuan nasa takin duh lohna a lantir. January 5, 2019 khan JNU Teachers’Association (JNUTA) chuan campus chhung buainate a kian theihna atan remna kawngzawh (peace march) an buatsaih a ni.

JNUTA-in peace march an neih lai hian mi ṭhahnem tak, hmai tuama hmanraw chi hrang hrang kengte’n an tibuai thut a, nasa takin kut an thlak. Misualte chu JNU-a Sabarmati hostel-ahte lutin, pindan hrang hrangah an kal kual a, bungruate tichhiain hostel-a cheng zirlai eng emaw zat kut an thlâk a; JNUSU President bakah zirlai leh professor 

ṭhenkhat (zirlaite thlavâng hauhtu) tiamin mi 40 vel an hliam.

November 2019 aṭang khan JNU zirlaite chuan university administration lamin zirlaite hmakhaw ngaihna tel miah loa hostel fee an tihsan duh lohna na takin an kal ṭanpui tawh a, centre/department hrang hranga zirlaite’n exam-te boycott in, Winter Semester 2020 atana registration January 1-5, 2019 chhunga kalpui tur pawh an boycott bawk. Hemi chungchangah hian left party thlawptute kaihhruai JNUSU leh BJP zirlai pawl ABVP-te inkarah thu inhmuh lohna hrang hrang a awm a, inchaltauhna a thleng chho reng a ni. Registration boycott-na kal zelah zirlai tu tih hriat lohte chu university server pek chhuahna building-ah lut tlang luiin, power supply an titawp a, technical staff-te chhuahtirin server an tichhia a ni.

January 4, 2020-ah pawh kut inthlakna a thleng a, boruak sosang zelin, January 5-ah buaina lian zawk a thleng zui leh a ni. January 5 zanah hian campus-a awm zirlaite an rálṭi hle a, mi tam tak campus-ah an riak ngam lo. JNU campus-a awm Mizo zirlai ṭhenkhat pawh Delhi Police-a Mizo awmte puihnain Vasant Vihar-a Mizoram House-ah an riak chhuak a ni.

JNU Mizo Forum chuan, Mizo ṭhangthar lo la awm zel turte tan pawh JNU chu zau takin inhawng thei se an duh thu tarlangin, "Tuna buaina pawh hi BJP kaihhruai sorkar laipuiin nasa taka India ram zirna sang zawkte sum siamna khawl ang leka chhuaha privatize a tumna kal zel nghawng chhuah niin kan hria a, kan dodal tlat a ni," an ti.