MLP Rules zir chiangtu commitee-in Wine zawrh leh siam khap ṭha an ti

Mizoram sorkarin Mizoram Liquor Prohibition (MLP) Rules zir chiangtu tur committee a din, deputy chief minister Tawnluia kaihhruai chuan, wine siam leh zawrh khap ṭha an ti a, Cabinet-a rawtna thlen an rêl.

Vanglaini palai zawhna chhangin committee vice chairman Dr K Beichhua, Excise & Narcotics minister chuan, MLP Draft Rules an duan chu Cabinet-in Dy. Chief Minister hoin zir chiang tura thutlukna an siam thu a sawi a, "Thil dangah chuan harsatna a awm lo a, kan buaina ber chu wine chungchang a ni. Zau zawka inràwn khawm ṭha tih a nih angin, kohhran leh tlawmngai pawl hruaitute nena inrâwn khawm a ni," a ti.

Dr K Beichhua chuan, committee chu ṭum li an ṭhukhawm tih sawiin, "Kut hnathawktute, a bik takin Champhai, Hnahlan leh a chhehvela grape chíngtute dinhmun ngaihtuah chungin uluk taka sawiho a ni. Mizoram Kohhran Hruaitute Committee leh Central YMA lamin zu lam hrim hrim zawrh ṭha an ti lo. MHIP leh MUP aiawhte pawh meeting-ah an tel ṭha hle," a ti a; grape chíngtute chu zahawm viau mah se, sawihona uluk taka neih a nih hnuah ram tana ṭha ber tura ngaihin thutlukna an siam niin a sawi.

END Minister sawi danin, MLP Rules tichhuak tura harsatna ber, wine chungchanga committee ngaihdan chu Cabinet ṭhutkhawm leh hmasak bera ngaihtuah tura thehluh tum a ni a; Cabinet-in a pawm chuan Assembly session hmasa berah put luh hman tura hmalak a ni ang.

MLP Rules zir chiangtu committee-ah hian member-te chu - School Education minister Lalchhandama Ralte, IPR minister Lalruatkima leh Law & Judicial minister TJ Lalnuntluanga te an ni a; committee-in ṭul a tih angin Mizoram Kohhran Hruaitute Committee, Central YMA, MHIP leh MUP aiawhte sáwm ṭhin a ni.

MLP Rules leh a kaihhnawih
• Zu zawrh khapna dan Mizoram (Liquor Prohibition), Act chu March 20, 2019 khan Assembly House-ah pawm a ni.
• MLP Rules chu December 19, 2019 khan notification hmangin chhuah a ni a, December 19, 2019-ah vek notification hmangin sût leh a ni.
• MLP Rules thar duan leh a ni a, Covid-19 avanga Cabinet meeting neih hleih theih a nih loh avangin by circulation-a hman mai rawtna Chief Minister hnenah an thawn.
• MLP Rules chu by-notification hmanga tihchhuah tum ni mah se, December 29, 2020-a CM Zoramthanga hoa Cabinet meeting chuan ennawn leh phawt an rêl. Ennawntu tur Deputy CM kaihhruai committee din a ni.