National Voters' Day hman a ni

Nimin January 25 kha National Voters' Day vawi 12-na a ni a; Election department huaihawtin Secretariat conference hall-ah hman niin, chief secretary Dr Renu Sharma khuallian a ni. District hrang hrangah District Election Officer hoin hman a ni bawk.

Aizawla hmannaah Dr Renu Sharma chuan, mipui rorelna democracy bulṭhut pawimawh tak chu inthlanna felfai leh thianghlim neih a nih thu a sawi a, "Hemi kawngah hian ram ang pawhin India-in a ti ṭha hle a, kumina National Voter Day thupui, inthlanna, mi tin huap, mi tin ban phâk leh mi tin tel theihna tura buatsaih leh hmalak chu mipui rorelna democracy-in a tum ber a ni," a ti.

Mizoram Legislative Assembly leh Parliamentary thlanna neih tawhte chu boruak muanawm tak hnuaiah felfai, thianghlim leh langtlang taka buatsaih nia a hriat thu sawiin Chief Secretary chuan, "Hei hi state leh mipui ang pawha kan inchhuanna tur a niin ka hria. Tlawmngai pawl hrang hrang te, civil society organisation-te nen kum tam tak thawhhona ṭha tak neiin kan thawk tlang a, an thawh hlâwk hle a ni," a ti a; pawl hrang hrangte hmalakna chu lawmawm a tih thu a sawi.

National Voter Day hmannaah hian Chief Secretary chuan kum 18 tling vote nei thar mi 10 hnenah electoral photo identity car (EPIC) a hlân a; booth level officer (BLO) thawk ṭha pathum - Vanlaldinpuia, H Laltlanthanga leh Lalngaisanga te hnenah BLO Award a hlan bawk.

January 25, 1950 khan Election Commission of India din niin, ECI din ni chu kum 2011 aṭang khan National Voter Day atan hman a ni a, kumina thupui chu ‘Making elections inclusive, accessible and participative’ tih a ni.

National Voter Day hmannaah hian chief electoral officer (CEO) P Jawahar, joint CEO David L Pachuau bakah sorkar hotu te, tlawmngai pawl aiawhte leh Mount Carmel School zirlaite an tel. National Voter Day hi district hrang hrangah hman a ni a, kumin aṭanga vote nei thar ṭhenkhatte hnenah EPIC hlan a ni.