Champhaiah pisa kái tur dang Republic Day boycott a ni dawn

Champhai District NGO Coordination Committee chuan ruahmanna an siam tawh angin, Champhai DC Maria CT Zuali sawnna thupek sût tura sorkar kar nan nimin khan Champhai khawpuia sorkar pisaa kái turte an dang. Vawiinah Republic Day an boycott dawn a, total bandh kalpui an tum erawh an ṭhulh.

Champhaia sorkar pisa kái turte dang tur hian Champhai District NGO CC member-te an thawk chhuak a, pisa hrang hrang kawtah an duty a ni. Pisa kai tum awm mah se, innawr buai ngai loin an kîr leh hlawm a ni.

Champhai Joint NGO-te chuan, he thu ziah lai thleng hian sorkar aṭangin thu dawn an la neih loh avangin Republic Day boycott tura ruahmanna an lo siam tawh chu kaltlangpui an tum tih an sawi.

Champhai NGO hruaitute chuan, Mizoram sorkarin DC-te transfer order tidanglam a, DC-te an awmna ngaia Republic Day thleng awm tura a tih leh DC sawnna order sût an phût chuan inzawmna a neih loh thu sawiin, Champhai DC transfer order chu cancel ngei an phût tih an sawi nawn a ni.

Hetih lai hian, Champhai District NGO Coordination Committee chuan total band huaihawt tura ruahmanna an siam tawh chu mipui lamin an hmalakna an thláwp ṭha thawkhata an hriat avang leh, mipui harsatna thlen zawnga hmalak zui tawh loh ṭha an tih avangin an ṭhulh dawn tih an sawi.