Sikul saknaah cheng nuai tam tak a bo - MPCC Vigilance
Mizoram Pradesh Congress Committee (MPCC) Vigilance Cell chuan nimin khan Aizawl Press Club-ah thuthar thehdarhtute an kâwm a; NABARD pawisa pûk hmanga sikul saknaah thil dik lo tam tak a awm a, cheng nuai tam tak a bo tih an puang.
MPCC Vigilance Cell chairman C Ngunlianchunga chuan, MNF kaihhruai sorkarin sikul 172 sak ṭhatna tura NABARD sum cheng nuai 3,500 a pûk hmanga hna thawh ṭhenkhat chu MPCC Vigilance Cell-in January 22, 2022 khan an tlawh tih sawiin, "School Education minister Pu Lalchhandama Ralte bial, Tuivawl constituency-ah ringawt pawh thil dik lo tam tak hmuh a ni," a ti.
C Ngunlianchunga chuan, MPCC Vigilance Cell-in sikul 15 an tlawh zingah a nih dan tur anga sak leh khawih a awm lo tih sawiin, "Sikul tina hna thawktute hian approved estimated amount aia nuai tam taka tlém vekin hna an thawk," a ti a; cheng nuai 72.92 hmanna turah nuai 55 te, nuai 57-tein an thawk a, nuai 29.18 man pawh nuai 20-21 velin an thawk a, nuai 18.03 man chu nuai 12-in an thawk niin a sawi.
MPCC Vigilance Cell chairman C Ngunlianchunga chuan, school repairing work cheng nuai 8-10 manah pawh tualchhung mi, party worker, a taka thawktute'n estimate angin an thawk lo hle tih sawiin, "Sikul repair-na sensoah hian a tlangpuii Rs 1,00,000 bak an sên a rinawm loh. Sikul ṭhenkhatah phei chuan Rs 1,00,000 aia tlem hial pawh hman a nih a rinawm," a ti. A taka thawh miah loh, pawisa kawngbo tam tak a awm ngeia a lan thu sawiin, "Education Minister hian he thil dik lo tak hi a sawifiah ngei tur a ni," a ti.
MPCC Vigilance Cell tarlan danin, ceiling atan milimetre 50-a chhah thermal insulation, Resin bonded fibre glass wool hman tura tih a nih laiin, silpauline hman a ni hlawm a, plywood hmanna sikul a awm bawk. Sikul ṭhenkhatah chuan ceiling siam a ni lo.
MPCC Vigilance tarlante
1. Darlawn H/S-II (ad hoc): Estimated amount Rs. 72.92. MNF party worker cheng nuai 55-in thawhtir a ni. Cheng nuai 17.92 a bo.
2. Ratu H/S: Estimated amount Rs. 8,00,000. Headmaster office sak tur a ni a, staff bathroom sak a ni.
3. Ratu M/S-II: Estimated amount nuai 29.18. Tualchhung mi MNF worker-in cheng nuai 21-in a thawk a, cheng nuai 8.18 a bo. Ceiling-ah mm. 50-a chhah thermal insulation, Resin bonded fibre glass wool hman tur a nih laiin silpauline hman a ni a, brick hmanga partition siam turah plywood hman a ni.
4. New Vervek M/S: Estimated amount nuai 29.18. Tualchhunga MNF worker pahnihin cheng nuai 14+6 = 20-in an thawk a, nuai 9.18 a bo. Room pali sak turah pahnih chiah an sa a, office thar sa loin a hlui an ring. Ceiling atan silpauline hman a ni a, brick hmanga partition siam turah plywood hman a ni.
5. Sakawrdai M/S-II: Estimated amount nuai 18.03. Tualchhung mi MNF worker-in nuai 12-in a thawk a, cheng nuai 6.03 a bo. Room pahnih siam tur a nih laiin pakhatah khai khawm a ni a, a sei zawng metre 9 tur a nih laiin metre 6.15 leh a vâng lam metre 5.8 turah metre 4.55 chauh a ni. Ceiling atan silpauline hman a ni.
6. Vaitin H/S(Adhoc Aided): Estimated amount nuai 72.92. MNF worker-in cheng nuai 57-in a thawk a, nuai 15.92 a bo. Ceiling atan plywood hman a ni.
7. Thingsat P/S: Estimated amount cheng nuai Rs. 10. Siam tura tihte siam a ni lo a, rawng hnawih nial nual a ni. Ceiling leh ventilation siam a ni lo.
8. Sawleng M/S: Estimates amount cheng nuai 10. Siam tura tih zinga mi tukverh leh kawngkhar thlak a ni lo. Partition wall siam a ni lo bawk.
9. Darlawn HSS: Estimated amount cheng nuai 8. Plastering, brick wall, rawng hnawih, kawngkhar leh tukverh thar leh in chung rangva thlak tura tih a ni a, building hma lam, mipuiin an hmuh mai theih chin chauh rawng hnawih a ni. Kawngkhar leh tukverh thlak a ni lo.
10. Darlawn H/S: Estimated amount cheng nuai 8. Plastering, kawngkhar leh tukverh thlak, partition wall siam leh Sintex barrel dah tur a ni. A hma lam chiah plaster a, rawng hnawih a ni a, a hnung lam zawng plaster loh leh rawng hnawih loh a ni. Darthlalang keh leh kawngkhar thlak a ni lo.
11. Palsang P/S: Estimated amount cheng nuai 29.18. Pindan panga, ft. 59.4 siam turah ft. 45 chauha sak a ni. Ceiling siam nan Rs. 4,25,000 dah a nih laiin siam a ni lo.
12. Palsang P/S: Estimated amount cheng nuai 10. In chung, kawngka, tukverh, ventilation, bang, furniture, ceiling leh plastering ti tura tih a nih laiin ventilation siam a ni lo. Building thar ft. 59.4 sak turah ft. 45 chiah sak a ni. Ceiling siam a ni lo a, a chungah Dyna Roof hman tura tih a nih laiin rangva narân hman a ni.
13. Zohmun M/S: Estimated cheng nuai 10. Partition wall siam a ni lo.
14. Zohmun HSS: Estimated cheng nuai 8. Ceiling atan silpauline hman a ni a, brick wall aiah skirting ft. 50x2 zelin brick rem a ni. Tukverh siam a ni lo.
15. Kepran M/S: Estimated cheng nuai 10. Tukverh leh ventilation ṭhenkhat thlak a ni a, ceiling siam niin, rawng hnawih thar a ni. Kudam ft. 6-a zauh a ni a, ṭhutthleng leh dawhkan chhia thawm ṭhat a ni.