CYMA-in February 2022 thleng sorkar a nghak dawn

Central YMA chuan, dan loa Myanmar aṭanga kuhva rah tawlh ruk tihtawp a nih theih nan February 2022 ral hma ngeia checkgate rintlak tak sorkarin a siam loh chuan CYMA-in a thiam danin hma a la dawn tih an tarlang.

Nimina YMA Central Executive Committee ṭhukhawm chuan dan loa kuhva tawlh rûk chungchang an ngaihtuah a, thuchhuah siam nghalin, "Dan loa kuhva sumdawnna tihtawp a nih theih nana YMA-in Chief Minister hnena ngenna ni 19.1.2022-a a siam tawh, checkgate siam a nih thuai theih nan hma la turin Mizoram sorkar kan ngen a ni. Checkgate rintlak tak February 2022 ral hma ngeiin sorkarin a siam lo a nih chuan YMA-in a thiam danin hma a la ang," an ti.

CYMA chuan, dan loa kuhvaa sumdawnna kalpui chungchangah YMA chu a dinna ngaiah a la ding tih tarlangin, "YMA hruaitute leh member-te inhnamhnawih lo turin kan in ngen nawn leh e," an ti a; Mizo mipuiah ngaihhlut zawng leh nun dan mawite nasa taka a nghawng avangin YMA-in theihtawpin a do zel dawn tih an tarlang.

CYMA chuan, dan loa kuhvaa sumdawnnaah Mizo mipui leh political party zawng zawng inhnamhnawih lo tur leh hmalaknaa tel lo turin an ngen bawk.