VC sum aṭanga 5% la ṭhen lo turin BJP-in Mizoram sorkar an phût

BJP, Mizoram Pradesh chuan, 15th Finance Commission aṭanga rural local body (VC)-te sum hmuh aṭanga Mizoram sorkarin administrative cost 5% lâk a tumna thupek chu a rang thei ang bera sût turin Mizoram sorkar an phût.

Mizoram BJP chuan thuchhuah siamin, VC-te tana 15th Finance Commission sum lo kal aṭanga state sorkarin lo pawh hêk a tum chu 15th FC kaihhruaina kalh a ni tih an tarlang a, "State sorkar hian State Own Resource aṭanga lo pek belh zawk tur an ni. MNF sorkar hian local self government (VC)-te enkawlna sum ruahmantu tur state 2nd Finance Commission pawh a din duh lo chunga central 15th FC grant lo lak ṭhen hi dan bawhchhiatna corruption lian tak a ni," an ti.

BJP, Mizoram Pradesh chuan, VC-te'n an khua ṭheuh hmasawnna an thawhna tur aṭanga administrative cost anga sum lâk ṭhensak chu Mizoram sorkarin thingtlang mite engah mah a ngaih lohzia tihlannaa an ngaih thu sawiin, "Mizoram sorkar hian administrative cost lâkna tur order a siam tawh hi a cancel lo a nih chuan sorkar laipuiah complaint kan thehlut nghal dawn," an ti.

Mizoram BJP hian Mizoram sorkarin order a lo siam tawh letter no: G.21016/5/2021-DTE(LAD) PLAN, Aizawl, January 2022 chu a rang thei ang bera sut turin an phût a; VC-te chanvo tur 15th FC-in a rawn pek chu thingtlang khuate hmasawnna tura Constitution Rights a ni tih hre turin Mizoram sorkar an chah a ni.