CM-in petrol pump thar a hawng

Chief minister Zoramthanga chuan nimin zing khan New Capital Complex-ah MIZOFED petrol pump thar a hawng a, Cooperation minister C Lalrinsanga'n gas cylinder chhuak thar Indane Composite a tlangzarh bawk.

CM Zoramthanga chuan, mipui tana ṭangkai tur thila MIZOFED hmalakna lawmawm a tih thu sawiin, "Mimal anga hlâwk tura thil tam tham thar chhuah, sâwngbâwl leh a zawrhna tur zawn thlengin thil hautak tak a ni thei a, mahse, cooperative anga hmalak a nih chuan thil tih a chakin a awlsam phah ṭhin. Sorkar pawhin cooperation society movement a ngai pawimawh a ni," a ti.

Hlawhtling turin harsatna hrang hrang tawhte malsawmnaa siam thiam a pawimawh tih sawiin Zoramthanga chuan, "Ṭangkaia siam nachang hriat a pawimawh a, hri léngin khawvel tibuaiin Mizoramah ngei pawh hmasawnna hna hrang hrang ṭhuanawp phah mahse harsatnate hi thil ṭha zawk atan hman thiam tumin rilru siam thiam a pawimawh," a ti a; MIZOFED hruaitute chu an kal zelna turah theihtawp chhuah turin duhsakna a hlân.

Cooperation minister C Lalrinsanga pawhin thu sawiin, tun dinhmunah Mizoramah MIZOFED-in dispensing unit pakua a neih thu a sawi a, "Kawnpui, Saitual leh Tlabungahte chhunzawm tum a ni," a ti a; mipui mamawh phuhrûk kawnga MIZOFED hna thawhte fakawm a tih thu a sawi.

Hawnna inkhawma tarlan danin, composite cylinder hi technology ṭha taka thuam a ni a, blow-moulded inner lines polymer-wrapped fibre glass leh a páwn lam HDPE-a tuam a ni. Kg. 5 leh kg. 10 awmin, tuna hman mek gas cylinder thira siam aiin a chanve velin a zâng zawk a ni.