KHAWTHLIR

Infiamna khap a ni
Chief secretary Dr Renu Sharma, SDMA State Executive Committee chairman ni bawk chuan, Covid-19 darh zual zel avangin infiamna (sport) lam chi reng reng tih phal a nih loh thu nimin khan thupek chhuahin a tarlang. Thupek hian January 7, 2022-a inkaihhruaina tihchhuah tawha infiamna chungchang chu a luahlân a; sport practise leh tournament zawng zawng a huam a ni.

Thisen pe
Lunglei College NSS chuan nimin khan thisen pek an huaihawt a, Civil Hospital, Lunglei tan thisen unit 22 an pe a, petute mipa 17 leh hmeichhia panga an ni. Higher & Technical Institution of Mizoram (HATIM) NSS pawhin nimin vek khan Lunglei Civil Hospital tan thisen unit 17 an pe a, petute mipa 14 leh hmeichhia pathum an ni.

Art Workshop 2022
Information & Public Relations department leh Mizoram Art Development Society chuan nimin khan Khatlaa MUP building-ah Colours of Mizoram Art Workshop 2022 an buatsaih ṭan a, IPR director Lallianpuii'n a hawng. Workshop hi January 28, 2022 thleng neih tur a ni.

MLA-in tanpui
Lengteng bialtu MLA L Thangmawia chuan nimin khan a bial chhunga tun hnaia Covid-19 hluarna khua - Ngopa, Saichal leh Chhawrtuia village level task force-te hnenah hripui dona hmanrua chi hrang hrang leh pawisa a pe.

Hmachhawp sawiho
Krishi Vigyan Kendra, Mamit district Scientific Advisory Committee chuan nimin khan an chairman Rohmingthanga Colney, Agriculture director kaihhruaiin kum 2021-a an hmalakna leh kum 2022 atana an hmachhawpte an sawiho. Rohmingthanga Colney hian Farmer’s Farm Diary a tlangzarh nghal a ni.

DC-in sawipui
Khawzawl bawrhsap CC Lalchhuangkima chuan January 24, Thawhṭanni khan Airtel leh BSNL hotute kâwmin, Khawzawl district-a mobile leh internet signal ṭha zawk a awm theih dan tur a sawipui. Khawzawla Airtel tower awm mek chu tichak tura hmalak mek a nih thu Bawrhsap an hrilh.