Tanker enkawltute himna ngaihtuah turin Home-in district DC leh SP-te a ngen

Assam Petroleum Mazdoor Union, Barak Valley Branch, Ramnagar chuan January 18, 2022 khan oil tanker driver leh handyman-te chu Lunglei district-a Mausen khuaah kut thlak an ni tih tarlangin, oil tanker enkawltute himna ngaihtuah turin Mizoram sorkar an ngen a; Home department chuan district tina DC leh SP-te chu an huam chhungah oil tanker enkawltute himna ngaihtuah turin a hriattir.

Assam Petroleum Mazdoor Union (APMU) chuan Mizoram Governor, Chief Minister, MIZOFED Managing Director, Vairengte Oil Depot Manager, Vairengte Oil Tanker Driver Union-te hnenah lehkha thawnin, January 18, 2022 chawhnu dar 2 vel khan oil tanker MZ-01 E-0374 driver Kazi Saidul Islam leh amah puitu Maruf Ahmed-te chu Mausen khuaah kutthlak an ni tih an tarlang.

APMU tarlan danin, January 18, 2022 chawhnu khan Ramnagar aṭanga Lunglei lam pana tlân oil tanker MZ-01 E-0374 chu Mausenah maxicab pahnih MZ-02 A-8839 leh MZ-07-4713 ten an ûm pha a, kawng zim lai a nih avangin tanker chuan kawng a kian mai thei lo a; maxicab driver-te chuan an tibuai zui ta a ni.

Maxicab-te'n an tlân pelh hnuah an ding a, tanker driver chu pawt thlain, kut an thlâk a, handyman pawh kut an thlâk zui a ni. Maxicab pakhat zawk driver chu maxicab aṭanga petrol la chhuakin, tanker driver chu a leih a, hâl a tum niin an tarlang. Tanker driver chu Rs 53,000 an chhuhsak niin an tarlang bawk.

AMPU chuan Mizoram sorkara lehkha an thawnah hian, Mizoram ni tin mamawh phurtu oil tanker driver-te himna pe turin an phût a, an lungawina khawpa Mizoram sorkarin hma a lak hma chuan Mizoramah tuialhthei phurh luh an tum rih loh thu an tarlang a ni.

Thil thleng chungchangah hian Home department deputy secretary David H Lalthangliana chuan district tina DC leh SP-te hnenah January 24, Thawhṭanni khan lehkha a thawn a; APMU-in FCSCA department-a ngenna an thlen leh FCSCA aṭanga lehkha an hmuh angin, an district ṭheuhah tuialhthei phurtu tanker driver-te himna ngaihtuah tur leh kut inthlâkna a thlen tawh loh nana hma la turin a ngen a ni.

Home Deputy Secretary-in ngenna lehkha a tihchhuah hma hian thil thleng chungchang hi Lunglei police-te chuan an bawhzui tawh a, January 21, 2022 khan thubuai ziak lutin, maxicab driver-te pawh an man tawh nia thu dawn a ni.

Lunglei police hotute hnen aṭanga thu dawn danin, maxicab driver-te'n tanker driver chu Rs 53,000 an chhuhsak lo a, an intlân pelh laiin an intâi avangin maxicab driver-te'n maxicab chhe lai siamna tur Rs 10,000 pe turin an phût a ni. Tanker driver pawhin Rs 10,000 chu a pe a, mahse, an chaw eina man tur tal pe lêt tura a ngen avangin Rs 500 an pe lêt a, Rs 9,500 an laksak a ni.

Assam Petroleum Mazdoor Union phûtte
* Maxicab driver-te'n Rs 53,000 an chhuhsak chu oil tanker driver leh handyman hnena pek lêt.
* Tanker driver leh handyman-te damdawia an inenkawlna senso tumsak.
* Maxicab pahnih driver-te a rang thei ang bera man.
* Oil tanker enkawltute himna ngaihtuahsak.
* MIZOFED, Lunglei Manager laka action lak.