Aizawlah street vendor 1,826 awm

Nimina Dawrpui Multipurpose Hall-a Aizawl khawpui kawng sira thil zuar (street vendor)-te tana Loan Camp buatsaihah, Aizawl Municipal Corporation (AMC) chhinchhiah danin, Aizawl khawpuiah street vendor 1,826 an awm mek a, chu'ng zinga 1,644 chu hmeichhia an ni tih tarlan a ni.

Loan Camp hi Urban Development & Poverty Alleviation (UDPA) department leh AMC buatsaih a ni a, Aizawl mayor Lalrinenga Sailo-in a hmanpui.

Loan hi Covid-19 léng mek avanga kawngsira thil zuar harsatna tawh mekte intun nun leh theih nan PM-SVANidhi scheme hnuaiah kalpui a ni a; June 1, 2020 khan India ram pum huapin Prime Minister-in a hawng a, Aizawlah chuan July 8, 2020-ah kalpui ṭan a ni.

Mi 322-in loan dilna an thehlut tawh a, chu'ng zinga mi 264 hnenah loan pek a ni tawh. Loan hi Mizoram Rural Bank-in pe chhuak tam berin, mi 189 hnenah an pe tawh a, State Bank of India-in mi 47 hnenah a pe tawh bawk.