Covid-19 vei hmuh tam ber ní a thleng

January 24, Thawhṭanni khan Mizoramah Covid-19 vei mi 2,222 hmuh chhuah a ni a, hmuh tam ber ní a ni. Hripui vei enkawl lai mi sing khat an chuang leh tawh. Nimin khan hripui vei dam tawh mi 653 chhuahtir an ni a, Covid-19 vangin mi pakhat a thi.

Covid-19 vei Thawhṭannia hmuh chhuah tharte chu mipa 927 leh hmeichhia 1,295 an ni a, RT-PCR hmanga hmuh 298, TrueNAT hmanga hmuh 66, RAT hmanga hmuh 1,803 leh FIA hmanga hmuh 55 an ni. Positivity rate chu 24.15% a ni a, mi 2,222 zinga mi 1,300-in symptom an nei.

IPR tarlan danin, hripui vei mi 20 aia tam hmuhna Aizawlah veng 22 leh Aizawl pawn lamah khua/veng 12 a awm a; hmuh chhuah tamna ber Lungpuizawl, Lungleiah mi 75 hmuh niin, Aizawla hmuh tamna ber Mission Vengah mi 60 hmuh a ni.

Lengpui Airport-ah RAT hmangin state páwn aṭanga rawn lut zinga mi 11 Covid-19 positive hmuh chhuah a ni a, screening point dang - Vairengteah mi pasarih, Kanhmunah 16 leh Tuivaiah mi pakhat hmuh a ni bawk.

Sample endikna district 11 zingah positivity rate chu 10% chung lam district pariat a awm a, a sànna ber Aizawl district-ah 33.94% a tling.

Nimin tlai dar 5 thleng khan hripui vei dam tawh mi 653 chhuahtir an ni a; district tina chhuak zat chu - Aizawlah 387, Serchhipah 56, Mamit leh Saitualah 43 ve ve, Lawngtlaiah 38, Champhaiah 31, Kolasib-ah 29, Lungleiah 24 leh Hnahthialah pahnih a ni.

IDSP record angin, Mizoramah Covid-19 vei 1,62,370 hmuh chhuah a ni tawh a, mipa 77,436 leh hmeichhia 84,934 an ni a, mipa aiin hmeichhia 7,498-in an tam zawk. Nimin tlai dar 5 thleng khan mi 1,51,734 (93.45%) chhuahtir an ni tawh a, mi 587 (0.36%) thi tawhin, enkawl mek mi 10,049 (6.19%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,62,370 chu mi 1,000 zelah hripui vei mi 148 an awm ang a ni a; mi 1,00,000 zela Covid-19 vangin mi 53 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 24, 2021 thlenga swab sample endik tawh 16,30,939 aṭanga RT-PCR hmanga endik zat percentage chu 20.76 a ni a, RAT hmanga endik zat chu 73.47% a tling.